បញ្ចូលពាក្យគន្លឹះ​​​​របស់អ្នកនៅទីនេះ

កម្មវិធីចុះកម្មសិក្សា

ដំណើរចុះ​កម្ម​សិក្សា​ឆ្ពោះ​ទៅ​កាន់​សារ​មន្ទីរ​ជាតិ

ដំណើរចុះ​កម្ម​សិក្សា​ឆ្ពោះ​ទៅ​កាន់​សារ​មន្ទីរ​ជាតិ

កាលពីថ្ងៃទី១៤ ខែកញ្ញា ឆ្នាំ២០១៧ កន្លងទៅនេះ គណៈគ្រប់គ្រងសាលារៀន អន្តរទ្វីប        អាមេរិកាំង បានដឹកនាំលោកគ្រូ អ្នកគ្រូបង្រៀនថ្នាក់ទី៣ និងទី៦ និងគ្រូបង្រៀនមុខវិជ្ជាប្រវត្តិវិទ្យា និងផែនដីវិទ្យា នៃសាលារៀន អន្តរទ្វីប អាមេរិកាំង ទាំងបីសាខាប្រមាណជា១០០នាក់ ធ្វើដំណើរចុះកម្មសិក្សានៅសារមន្ទីរជាតិ ដែលស្ថិតនៅរាជធានីភ្នំពេញ។​នៅពេលធ្វើដំណើរទៅដល់សារមន្ទីរជាតិ គណៈគ្រប់គ្រងបានដឹកនាំលោកគ្រូ អ្នកគ្រូចូលទៅក្នុងបរិវេណសារមន្ទីរជាតិ ហើយមគ្គទេសក៍ប្រចាំការនៅទីនោះក៏បានបង្ហាញពីប្រភេទចម្លាក់ ក្បូរក្បាច់រចនា អាយុកាល ប្រវត្តិសាស្ត្រ និងឈ្មោះផ្សេងៗរបស់ចម្លាក់នីមួយៗ ជាពិសេសបានធ្វើការបង្ហាញប្រាប់អំពីមរតកស្នាដៃ ដែលដូនតាខ្មែរបានបន្សល់ទុកមករហូតមកដល់បច្ចុប្បន្ន។ បន្ថែមលើនេះទៅទៀត មគ្គទេសក៍បានរៀបរាប់ និងបង្ហាញពីសម័យកាលនីមួយៗនៃការកសាងប្រាសាទ ក៏ដូចជាចម្លាក់ជូនដល់លោកគ្រូ អ្នកគ្រូបានយ៉ាងក្បោះក្បាយ និងស៊ីជម្រៅផងដែរ។ក្រោយពីចុះកម្មសិក្សានៅសារមន្ទីរជាតិទាំងមូលចប់សព្វគ្រប់ហើយ គណៈគ្រប់គ្រងបានដឹកនាំលោកគ្រូ អ្នកគ្រូធ្វើដំណើរត្រឡប់មកកាន់ាសាលារៀនវិញ ហើយលោកគ្រូ អ្នកគ្រូទាំងអស់បានថតរូបអនុស្សាវរីយ៍ និងធ្វើដំណើរត្រឡប់មកដល់សាលារៀនវិញប្រកបដោយសុវត្ថិភាព និងភាពសប្បាយរីករាយ។ លោកគ្រូ អ្នកគ្រូបានស្គាល់ បានយល់ដឹងកាន់ស៊ីជម្រៅអំពីចម្លាក់សាសនានានា ចម្លាក់ក្បូរក្បាច់ រចនាបថផ្សេងៗក្នុងការកសាងចម្លាក់ប្រាសាទជាដើម ហើយលោកគ្រូ អ្នកគ្រូបានស្រូបយកនូវខ្យល់អាកាសបរិសុទ្ធធ្វើឱ្យអារម្មណ៍ស្រស់ថ្លា និងបានមើលឃើញទិដ្ឋភាពដ៏ស្រស់ស្អាត   ផ្សេងៗនៅទីនោះ ដែលបរិយាកាសទាំងអស់នេះធ្វើឱ្យលោកគ្រូ អ្នកគ្រូអាចបំបាត់អស់ភាពនឿយហត់ និងបង្កជាភាពសប្បាយរីករាយ។

កម្មវិធីចុះកម្មសិក្សានៅព្រះបរមរាជវាំង

កម្មវិធីចុះកម្មសិក្សានៅព្រះបរមរាជវាំង

កាលពីថ្ងៃទី១៣ ខែកញ្ញា ឆ្នាំ២០១៧ កន្លងទៅនេះ អ្នកគ្រូ លោកគ្រូនៃសាលារៀន​ អន្តរទ្វីប​ អាមេរិកាំង​ សាខាសេទុងបានចុះកម្ម​សិក្សា​ព្រះបរមរាជ​វាំង​ចតុមុខមង្គល​។​ ការចុះកម្មសិក្សា​សម្រាប់ឱ្យ​លោកគ្រូ អ្នកគ្រូស្វែងយល់បន្ថែមអំពីឈ្មោះរាជធានីខ្មែរ​ ដែល​បាន​ផ្លាស់​ប្ដូរ​ជាបន្តបន្ទាប់​តាំង​ពី​សម័យ​បុរាណ​រៀងមក​ និង​ស្គាល់​ព្រះរាជដំណាក់​ព្រះ​មហាក្សត្រ​ខ្មែរ​ និង​ព្រះ​រាជញាតិវង្ស​គង់​ប្រថាប់​ឱ្យ​កាន់​តែ​ច្បាស់​ ​ឈ្មោះ​ប្រាសាទ​នានា​ ដែល​មាន​នៅ​ក្នុង​ព្រះ​បរមរាជវាំង​ និង​ស្គាល់​ព្រះនាម​ព្រះមហាក្សត្រ​ខ្មែរ​តាម​សម័យ​កាលនីមួយៗ​​ ​សិក្សា​ពីវត្ថុ​មាន​តម្លៃ​ និង​សម្បត្តិ​បេតិកភណ្ឌ​របស់​ប្រទេសជាតិ ​ដែល​មាន​អាយុ​កាល​រាប់រយ​ឆ្នាំ​មកហើយ​ ព្រមទាំង​បាន​ស្គាល់នូវ​មណ្ឌល​វប្បធម៌​ជាតិ​ ដែល​ជា​តំណាង​របស់ជាតិ​ទាំងមូល​ យល់​ដឹង​ពីរឿងរ៉ាវ​ និង​ព្រឹត្តិការណ៍​មួយចំនួន​ស្ដីពី​ប្រវត្តិសាស្រ្ត​ប្រទេស​កម្ពុជា​ និង​ពង្សសាវតា​រ​កម្ពុជា​កាន់​តែច្បាស់​ ​ពីសិល្បៈ​ ប្រវត្តិសាស្រ្ត​ សាសនា​ និង​វប្បធម៌​ប្រពៃណីខ្មែរ​ ផ្សារ​ភ្ជាប់​ទៅនឹង​ស្ថាបត្យកម្ម​ដ៏ល្អ​វិចិត្រ​​នៃ​ព្រះបរមរាជវាំង​។​ ​

លោកគ្រូ អ្នកគ្រូ AIS ចុះកម្មសិក្សារោងចក្រផលិតទឹកដោះគោ អង្គរមីល លើកទី១១

កាលពីថ្ងៃ១១ ខែកញ្ញា ឆ្នាំ២០១៧ កន្លងទៅនេះ គណៈកម្មការ សាលារៀន អន្តរទ្វីប អាមេរិកាំង ​សាខា​ម៉ៅ​សេទុង បាននាំគ្រូ​ផ្នែក​មត្តេយ្យ​ ​និង​បឋម​សិក្សា​ ​ប្រមាណ​ជាង​៥០​នាក់​ ​ទៅ​សិក្សា​ឈ្វេង​យល់​ពី​រោង​ចក្រ​ផលិត​ទឹក​ដោះគោ​ អង្គរមីល​ ដែល​ស្ថិត​នៅ​ក្នុង​តំបន់​សេដ្ឋកិច្ច​ពិសេស​ភ្នំពេញ​ ​ ។​ តំណាង​ម្ចាស់​រោង​ចក្រ​បាន​ទទួល​ស្វាគមន៍​លោកគ្រូ​អ្នកគ្រូ ​យ៉ាង​កក់ក្ដៅ​ ​និង​បាន​រៀប​រាប់​ពី​ប្រវត្តិខ្លះៗ​របស់ក្រុមហ៊ុនផង​ ​ព្រមទាំង​ខ្សែ​សង្វាក់​ផលិត​កម្ម​របស់​រោងចក្រ​ផលិត​ទឹក​ដោះគោ​ឱ្យ​លោកគ្រូ អ្នកគ្រូ ​ ​ដឹង​ច្បាស់​ផង​ដែរ។ ​ក្នុង​នោះ​ក៏​មាន​ដែរ​ ​ការ​សួរ​សំណួរ​ទៅ​កាន់​តំណាង​ម្ចាស់​រោងចក្រ​ ដើម្បី​ទទួល​បាន​ចំណេះ​ដឹង​បន្ថែម​ទាក់ទង​នឹង​ការ​ផលិត​ទឹក​ដោះគោ​ ​ឬ​ផលិត​ផល​ដែល​ជា​រូប​ធាតុ​ដើម​ និង​ភ្លក់​រសជាតិ​នៃ​ទឹកដោះគោ​ដែល​ផលិត​ចេញ​ពី​រោង​ចក្រ​ដោយ​ផ្ទាល់។ ​ ​ការចុះកម្មសិក្សា​នេះ​ ​ធ្វើ​ឡើង​ក្នុង​គោលបំណង​ឱ្យ​លោកគ្រូអ្នកគ្រូ​បាន​សិក្សា​ឈ្វេងយល់​ច្បាស់​ពី​រោងចក្រ​ និង​សង្វាក់​ផលិត​កម្ម​ទឹក​ដោះ​គោ​ជាក់ស្ដែង​ ​ដើម្បី​បង្កើត​ចំណេះដឹង​ទូទៅ​របស់​ខ្លួន​ក្នុង​ការ​បង្រៀន​សិស្សានុសិស្ស​ឱ្យ​កាន់តែ​ទូលំទូលាយ។ ​ គណៈកម្មការសាលាមិន​ត្រឹមតែ​ពង្រឹង​លើ​ផ្នែក​គរុកោសល្យ​បង្រៀន​តែ​មួយ​មុខ​ប៉ុណ្ណោះទេ ​តែជា​មួយ​នឹង​គ្នា​នេះ​ គណៈកម្មកា​ក៏​បាន​បញ្ជ្រាប​ចំណេះដឹង​លើ​ផ្នែក​ចំណេះទូទៅ​ក៏​សំខាន់​ដែរ​ ដើម្បី​ផ្សារ​ភ្ជាប់​ទៅ​នឹង​ការ​បង្រៀន​របស់​លោកគ្រូអ្នកគ្រូ​ឱ្យ​កាន់​តែ​មាន​ប្រសិទ្ធភាព​ខ្ពស់​ក្នុង​ការ​បង្រៀន​សិស្ស។​ អត្ថបទដកស្រង់សារព័ត៌មាន ឌិ អ៊ីនធ័រខន​ រ៉ូស្ទ័រ

លោកគ្រូ អ្នកគ្រូ AIS ៦០នាក់ ចុះកម្មសិក្សារោងចក្រផលិតទឹកស្អាត

កាលពីថ្ងៃ៨ ខែកញ្ញា ឆ្នាំ២០១៧ កន្លងទៅនេះ គណៈកម្មការសាលារៀន អន្តរទ្វីប អាមេរិកាំង បាននាំលោកគ្រូ អ្នកគ្រូបឋមសិក្សា អនុវិទ្យាល័យ និងវិទ្យាល័យ ទាំងបីសាខា​ ប្រមាណ៦០នាក់​ ​ បាន​ចុះកម្ម​សិក្សា​រោងចក្រផលិត​ទឹកស្អាត​និរោធន៍​ ស្ថិត​នៅ​ឯភូមិ​ឬស្សីស្រស់​ សង្កាត់​និរោធន៍​ ខណ្ឌច្បារអំពៅ​ រាជធានី​ភ្នំពេញ។ ​ ប្រធាន​នាយកដ្ឋាន​ផលិតកម្ម​ និង​ផ្គត់ផ្គង់​ទឹកស្អាត​រូបនេះ​ ក៏បាន​រៀបរាប់ពីប្រវត្តិ​ខ្លះៗ​របស់​រោង​ចក្រផលិត​ទឹក​ស្អាត​ក្នុង​ទីក្រុងភ្នំពេញ​ ឱ្យ​គ្រូបង្រៀន​សាលារៀន​ អន្តរទ្វីប​ អាមេរិកាំង​ ស្ដាប់​ផងដែរ។ លុះ​ពេល​ឆ្លង​កាត់​ដំណាក់​ចម្រោះរួចហើយ​ គេនឹង​បង្ហូរ​ទឹកទាំង​នោះចូល​ទៅក្នុងអាង​ស្ដុកទឹក​ ដែល​ជាដំណាក់​កាលចុងក្រោយ​ ហើយ​ទឹកទាំង​នេះ​អាច​ចែកចាយ​ដល់​ប្រជាពលរដ្ឋ​ប្រើប្រាស់​បាន។ ​ ដំណើរទស្សនកិច្ច​សិក្សា​ទៅកាន់រោងចក្រ​ផលិតទឹកស្អាត​នេះ​ ធ្វើឡើង​ក្នុងគោលបំណងចូលរួមចំណែកផ្សព្វផ្សាយ​ អប់រំ​ចំណេះដឹង​ និងបណ្ដុះស្មារតីលោកគ្រូអ្នកគ្រូនៃសាលារៀន​ អន្តរទ្វីប អាមេរិកាំង​ ឱ្យចូលរួមសិក្សាឈ្វេងយល់​ពីប្រព័ន្ធចម្រុះទឹកស្អាត​ និង​សេវាផ្គត់ផ្គង់​ទឹកស្អាតរបស់រដ្ឋាករទឹកស្វយ័តក្រុងភ្នំពេញ​ ដើម្បីយកចំណេះដឹងទាំងនោះមកចែករំលែក​ដល់សិស្សានុសិស្ស​របស់ខ្លួន។ អត្ថបទដកស្រង់សារព័ត៌មាន ឌិ អ៊ីនធ័រខន​ រ៉ូស្ទ័រ

សិស្សានុសិស្សក្រោមមត្តេយ្យ និងមត្តេយ្យសិក្សាចុះកម្មសិក្សា

កាលពីថ្ងៃទី២៥ ខែឧសភា ឆ្នាំ២០១៧ កន្លងទៅនេះ សាលារៀន អន្តរទ្វីប អាមេរិកាំ ទាំងបីសាខា បានដឹកនាំសិស្សានុសិស្សក្រោមមត្តេយ្យ និងមត្តេយ្យសិក្សាទាំងអស់ទៅចុះកម្មសិក្សានៅកន្លែងកម្សាន្តសម្រាប់កុមារ នៃមជ្ឈមណ្ឌល ឃីត ស៊ីធី ដែល​ស្ថិត នៅអគារលេខ១៦២A  មហាវិថី​ព្រះ​សី​ហនុ ​រាជធានីភ្នំពេញ។ សិស្សានុសិស្ស​ទទួលបាននូវចំណេះដឹងច្រើនមានដូចជា ស្គាល់ស្លាកសញ្ញាចរាចរណ៍មួយចំនួននិងកំណត់សម្គាល់ផ្សេងៗ ដែលប្រើប្រាស់លើដងវិថី ស្វែងយល់ពីឧបករណ៍សិក្សាដ៏ទំនើបៗ នៅក្នុងមជ្ឈមណ្ឌលកម្សាន្ត​សម្រាប់កុមារជាមួយមិត្ដរួមថ្នាក់របស់ពួកគេ ឃើញរូបភាព និង​​​ស្ថាន​ភាព​ពិតៗ​ដែល​ពួកគេ​ធ្លាប់​បាន​សិក្សា​ក្នុង​ថ្នាក់រួម​ទាំង​រៀន​នូវ​វាក្យសព្ទថ្មីៗ​បន្ថែម​ទៀត ។ សិស្សា​នុសិស្ស​ទទួល​បាន​នូវ​ចំណេះដឹង ភាព​សប្បាយ​​រីករាយ និង​បាន​ថតរូប​ជា​ច្រើន​ទុកជា​អនុស្សាវរីយ៍។