ដំណើរទស្សនកិច្ចសិក្សាលើកទី៤០ របស់សិស្សានុសិស្សសាលារៀន អន្ដរទ្វីប អាមេរិកាំង (AIS)
11 មិថុនា 2011

ឯកឧត្ដម ឧកញ៉ា វេជ្ជបណ្ឌិត គួច ម៉េងលី ស្ថាបនិក និងចាងហ្វាង​នៃសាលារៀន អន្ដរទ្វីប អាមេរិកាំង បានលើក ឡើងថា ការរៀបចំឱ្យប្អូនៗ​សិស្សានុសិស្សចុះ​ធ្វើទស្សន​កិច្ចសិក្សា​នៅតាម​សហគមន៍ និងតំបន់កសិកម្ម​សំខាន់ៗ​ដោយ ផ្ទាល់ គឺជាវិធីសាស្ដ្រ​ចាំបាច់មួយ ដែលជួយ​ជំរុញដល់ការ​សិក្សា​រៀនសូត្រ​របស់គាត់ឱ្យ​​កាន់តែមាន​ការអភិវឌ្ឍឈាន​ឡើង​យ៉ាងឆាប់​រហ័ស ។ លោកបាន​ឱ្យដឹងផងដែរថា កាលពី​សប្ដាហ៍កន្លង​ទៅនេះគណៈគ្រប់​គ្រងសាលារៀន អន្ដរទ្វីប អាមេរិកាំង បានដឹក​នាំដំណើរ​ទស្សនកិច្ចសិក្សា​មួយឆ្ពោះ​ទៅកាន់ចម្ការ​កៅស៊ូ និងរោង​ចក្រកែច្នៃ​ជ័រកៅស៊ូ ពាមជាំង ដែលស្ថិត​នៅក្នុង ឃុំព្រះធាតុ ស្រុកអូរាំងឪ ខេត្ដកំពង់ចាម ដោយមាន​ការចូលរួម​ពីសំណាក់​សិស្សានុសិស្ស លោកគ្រូ អ្នកគ្រូ និងបុគ្គលិក​សរុប ចំនួន៤១៨នាក់ ។

    ដំណើរ​ទស្សនកិច្ចសិក្សា​លើកទី៤០នេះ សិស្សានុសិស្ស​មានឱកាស​ស្វែងយល់​ពីជីវភាព និង​ការប្រកប​មុខ​របរ​រស់នៅ របស់​ប្រជាពលរដ្ឋ​កម្ពុជា​នៅតាម​ទីជនបទ ពិសេស​គឺសិក្សា​ពីដំណាំ​កសិកម្មកៅស៊ូ និងបច្ចេក​ទេស​កែ​ច្នៃជ័រ​កៅស៊ូពាក់​កណ្ដាល សម្រេចសម្រាប់​នាំចេញ​ទៅបរទេស ។ មិនតែប៉ុណ្ណោះ សិស្សានុសិស្ស​ទាំងអស់បាន​សិក្សាស្វែង​យល់​កាន់តែ​ស៊ី​ជម្រៅ​​ពីបច្ចេកទេស​ក្នុងការដាំដុះ​កៅស៊ូ និងបច្ចេកទេស​ទាញយក​ទិន្នផល​ពីដំណាំកៅស៊ូ ដែល​ទិដ្ឋភាព​ទាំងអស់នេះ​ជាថ្នាល​បណ្ដុះផ្នត់គំនិត ឱ្យសិស្សានុ​សិស្សចាប់​អារម្មណ៍ និងផ្ដល់​តម្លៃទៅ​លើវិស័យ​កសិកម្ម ដែល​ជាវិស័យ​មួយផ្ដល់​ដង្ហើម​ដល់​សេដ្ឋកិច្ច​ជាតិយើង ។

​​​​ស្ថិតក្នុង​ឱកាសនោះ​ផងដែរ សិស្សានុសិស្ស​ដែលបាន​ចូល​​រួមដំណើរ​ទស្សនកិច្ច​សិក្សានេះ​​បាន​សម្ដែងនូវ​ចំណាប់​អារម្មណ៍ របស់ខ្លួនឱ្យអ្នក​យកព័ត៌មានយើង​ដឹងដែរថា រូបប្អូននិងយុវសិស្ស​ដទៃទៀត​មាន​ភាពសប្បាយ​រីករាយ​ដោយ​បានទទួល​នូវចំណេះ ដឹងថ្មីៗយ៉ាង​ច្រើនបន្ថែមលើ​ខ្លឹមសារមេរៀន ហើយបាន​សិក្សាជាក់​ស្ដែងពី​​បច្ចេកទេស​បណ្ដុះកូន​កៅស៊ូ ការផ្សាំបំបៅ ការជ្រើស រើសពូជ ការជ្រើសរើស​ប្រភេទដី ការចៀរជ័រកៅស៊ូ ហើយ​ពិសេស​គឺបាន​ដឹងពី​អត្ថប្រយោជន៍​ដើមកៅស៊ូ និងជ័រកៅស៊ូ ដែលជា​រូបធាតុដើម​សម្រាប់​ផលិត​​គ្រឿងសម្ភារ​ប្រើប្រាស់ ដែលពីមុន​មក​ពួកគេ​ធ្លាប់តែបាន​ទិញស្រាប់ៗ និងឃើញ​អាជីវករដាក់លក់នូវ គ្រឿងសង្ហារិម ដែលផលិតចេញ​ពីដើមកៅស៊ូ និងផលិត​ផលច្នៃចេញ​ពីជ័រកៅស៊ូ​នៅតាមទីផ្សារ​នានាប៉ុណ្ណោះ ។ ពួកគេមានចិត្ដ រំភើប​យ៉ាងខ្លាំង ដោយបាន​ចូល​ទស្សនកិច្ច​សិក្សាចម្ការកៅស៊ូ ដែលលាត​សន្ធឹងល្វឹង​ល្វើយដាច់​កន្ទុយភ្នែក​លើផ្ទៃដី​ក​សិកម្ម​ជាង ៣០០០ហិចតា​​ក្នុងតំបន់ដី​ក្រហម​នៃខេត្ដកំពង់ចាម ។ នៅចុងបញ្ចប់​នៃដំណើរទស្សន​កិច្ចនេះ ពួកគេបាន​ទាំង​ជួយសម្អាត បរិស្ថាន​ក្នុងបរិវេណ​ចម្ការកៅស៊ូ និងបានចូល​សួរសុខទុក្ខ និងចែក​សម្ភារសិក្សា​​ជូនដល់​សិស្សានុសិស្ស​​សាលាបឋម​សិក្សាភូមិ៥៤ និងភូមិ​២៧ ក្នុងតំបន់​ចម្ការកៅស៊ូ ដើម្បីលើក​ទឹកចិត្ដដល់​​សិស្សានុសិស្ស​ទាំងនោះ​​ឱ្យកាន់តែ​ខិត​ខំ​រៀនសូត្រ ហើយ​បាន​រួម ចំណែក​​អភិវឌ្ឍសង្គមជាតិ​ទៀតផង ។


 
រក្សាសិទ្ធិ©ឆ្នាំ 2010-2014, សាលារៀន អន្តរទ្វីប អាមេរិកាំង
រៀបចំដោយ: AIS Web Services
Select Class
Term
Select Academic Year


Select score file: