គ្រូឆ្នើមដើម្បីសាលាឆ្នើម

សាលារៀន អន្តរទ្វីប អាមេរិកាំង ជាកន្លែងដែលពោរពេញទៅដោយធនធានផ្នែកអប់រំដ៏ឆ្នើមសម្រាប់កូនៗរបស់លោកអ្នក។

ក្រៅពីនេះ យើងក៏មានផ្នែកសំខាន់ៗផ្សេងៗទៀតដែលធ្វើការសម្រាប់កសាងនូវលទ្ធផលអប់រំដ៏ត្រចះត្រចង់ដល់កូនៗរបស់លោកអ្នក ដូចជា ផ្នែកនាយកដ្ឋានប្រតិបត្តិការ ផ្នែកធនធានមនុស្ស ផ្នែកហិរញ្ញវត្ថុ ផ្នែកព័ត៌មានវិទ្យា ផ្នែកសុវត្ថិភាព និងអនាម័យ និងផ្នែកទីផ្សារជាដើម។

www.mjqjobs.com

យើងនឹងបង្ហាញគ្រូឆ្នើមមួយចំនួនដូចខាងក្រោម៖

អ៊ុក ច័ន្ទដារ៉ា

គ្រូបង្រៀនភាសាខ្មែរ

គ្រូបង្រៀន ឯកទេសអក្សរសាស្ត្រខ្មែរពីសាកលវិទ្យាល័យភូមិន្ទភ្នំពេញ និងវិទ្យាស្ថានជាតិអប់រំ រាជធានីភ្នំពេញ។ បន្ទាប់ពីផ្លាស់ប្តូរទីលំនៅពីទីរួមខេត្តកំពង់ចាមជាទីផ្តល់កំណើតមកទីក្រុងរហូតបញ្ចប់ការសិក្សាថ្នាក់បរិញ្ញាបត្រ និងវគ្គបណ្តុះបណ្តាលគរុកោសល្យដោយជោគជ័យមក ខ្ញុំបានប្រែប្រួលខ្លួនពីសិស្ស និស្សិត គរុនិស្សិតម្នាក់ទៅជាអ្នកផ្តល់ចំណេះដឹងដល់សិស្សវិញ។ ការណ៍នេះ ក៏ដោយសារតែវាជាឧបនិស្ស័យដែលតែងស្រឡាញ់ការអប់រំតាំងតែពីតូចមក និងតែងស្រមៃថានឹងក្លាយជាគ្រូនាពេលអនាគតនោះឯង។

នៅដើមឆ្នាំ២០០៨ ខ្ញុំបានប្រឡូកចូលបម្រើការងារជាមន្ត្រីរាជការស៊ីវិលក្របខណ្ឌរដ្ឋផ្នែកអប់រំរបស់ក្រសួងអប់រំ យុវជន និងកីឡា ដោយចាប់ផ្តើមការងារឯវិទ្យាល័យ សម្តេចអគ្គមហាសេនាបតីតេជោហ៊ុនសែន បាធាយ រហូតមក។ ដោយមូលហេតុគិតថា ប្រទេសជាតិមួយរីកចម្រើន គឺដោយសារសង្គមនោះពោរពេញដោយធនធានមនុស្សប្រកបដោយសក្តានុពល ដូចនេះការរួមចំណែករបស់ខ្ញុំបាទ ពិតជាពោរពេញដោយមោទកភាពណាស់។

ការអភិវឌ្ឍខ្លួន និងមហិច្ឆតាខ្លួនមិនបានបញ្ចប់ត្រឹមចំណុចនេះទេ នៅខែមីនាឆ្នាំ២០១៦ ខ្ញុំបានបន្តប្រឡូកកាន់តែជ្រៅទៅក្នុងការអប់រំនេះ។ គ្រឹះស្ថានអប់រំឯកជនដ៏ធំល្បីល្បាញដែលផ្តោតលើគុណភាព វិន័យ និងសេវាកម្មល្អ ជាជម្រើសទីមួយរបស់ខ្ញុំ។ សាលារៀន អន្តរទ្វីប អាមេរិកាំង បានក្លាយជាផ្ទះដ៏កក់ក្តៅទី២ ខ្ញុំបានចាប់ផ្តើមបង្រៀនភាសាខ្មែរសម្រាប់កម្រិតថ្នាក់ទី១១ និង១២។ ខ្ញុំបានរៀនសូត្ រនិងដកបទពិសោធថ្មីៗច្រើនរាប់មិនអស់ នៅទីនេះមិនមែនបង្រៀនសិស្សតែចំណេះដឹងទូទៅប៉ុណ្ណោះទេ ថែមទាំងបង្កើតកម្មវិធីជាច្រើនទៀត ដើម្បីឱ្យសិស្សមានឱកាសស្វែងយល់ពីសង្គមខាងក្រៅឱ្យបានច្រើនទាំងសិក្ខាសាលា ដំណើរទស្សនកិច្ចសិក្សានានាជាដើម។ បើងាកមកចាប់អារម្មណ៍ពីបរិស្ថានសាលា ការងារ រួមទាំងទំនាក់ទំនងរវាងបុគ្គលិកគ្រប់ជាន់ថ្នាក់វិញ គឺពិតជាល្អប្រសើរណាស់។

ទោះបីទំហំការងារកាន់តែរីកធំ តែខ្លួនខ្ញុំពេញចិត្តនឹងរៀនពីអ្វីដែលថ្មីៗ រឿងដែលគួរឱ្យកត់សម្គាល់ទៅទៀតឃើញថា ការបំពេញការងារក្នុងពេលដ៏ខ្លីសោះ តែខ្លួនខ្ញុំពិតជារៀនបានច្រើនមែនទែន រឹតតែធ្វើឱ្យខ្លួនឯងមានទំនួលខុសត្រូវខ្ពស់លើមនសិការវិជ្ជាជីវៈខ្លួនថែមទៀត។

ខ្ញុំប្តេជ្ញាថានឹងខិតខំបំពេញតួនាទីខ្លួនឱ្យរឹតតែល្អទៅទៀត ជាពិសេសការសិក្សាស្រាវជ្រាវអ្វីៗដែលថ្មីៗ ដើម្បីយកមកបង្ហាត់សិស្សឱ្យរឹតតែរស់រវើក ធានាឱ្យបាននូវដំណើរការរៀន និងបង្រៀនប្រកបដោយប្រសិទ្ធភាពខ្ពស់តាមការរំពឹងទុក។ រឹតតែវិសេស គឺការកសាងខ្លួន ក៏ដូចជាក្មេងៗជំនាន់ក្រោយឱ្យក្លាយជាសសរដ៏រឹងមាំក្នុងកិច្ចរួមចំណែកទ្រទ្រង់ ក៏ដូចជាអភិវឌ្ឍជាតិយើងឱ្យកាន់តែលូតលាស់ទៅមុខប្រកបដោយវឌ្ឍនភាពថ្មីៗឡើងថែមទៀតផងដែរ។

សាន សុធាន

គ្រូបង្រៀនកុំព្យូទ័រ

គ្រូបង្រៀនកុំព្យូទ័រ នៅសាលារៀន អន្តរទ្វីប អាមេរិកាំង និងជាគ្រូកុំព្យូទ័រនៅវិទ្យាល័យ ហ.ស តាខ្មៅ។ ខ្ញុំបានប្រឡងជាប់នៅ វិទ្យាស្ថានជាតិអប់រំ នៅឆ្នាំ២០០៨ ចាប់ផ្ដើមអាជីពជាគ្រូបង្រៀននៅខែតុលា ឆ្នាំ២០០៩ ហើយត្រូវបានបញ្ជូនទៅធ្វើការនៅសាលាគរុកោសល្យ និងវិក្រឹតការ ខេត្ដសៀមរាប អំឡុងពេលនោះខ្ញុំបានឆ្លងកាត់សិក្ខាសាលា និងវគ្គសិក្សាទាក់ទងនឹងវិស័យអប់រំនៅកម្ពុជារយៈពេល៣ឆ្នាំ ហើយក៏បានបង្រៀនក្រៅម៉ោងនៅសកលវិទ្យាល័យ CUS (សៀមរាប) ផ្នែក Networking។ ក្នុងឆ្នាំ២០១០ ដល់ ឆ្នាំ២០១២ បានបន្ដថ្នាក់អនុបណ្ឌិត ផ្នែកព័ត៌មានវិទ្យា នៅសាកលវិទ្យាល័យ Sikkim Manipal University។

ចាប់ពីឆ្នាំ២០១១ ដល់ឆ្នាំ២០១៤ បានបង្រៀនកុំព្យូទ័រនៅអង្គការភាពញញឹមនៃកុមារ (PSE Org) ដើម្បីជួយដល់កុមារក្រីក្រ។ ថ្ងែទី០១ ខែតុលា ឆ្នាំ២០១៣ ត្រូវបានផ្លាស់ប្ដូរការងារពីខេត្តសៀមរាបមកខេត្តកណ្ដាលរហូតដល់បច្ចុប្បន្ននេះ ។ នៅឆ្នាំ២០១៦ ខ្ញុំបានសហការជួយពិនិត្យ និងកែសម្រួលសៀវភៅសិក្សាកុំព្យូទ័ររបស់សាលារៀន អន្តរទ្វីប អាមេរិកាំង។

រឿង គីរី

គ្រូបង្រៀនមុខវិជ្ជាជំនាញ

គ្រូបង្រៀនមុខវិជ្ជាជំនាញ (ហ្គីតា) និងជាទន្តបណ្ឌិតនៃបន្ទប់ពិគ្រោះមាត់ធ្មេញឯកជនមួយដែលស្ថិតនៅក្នុងរាជធានីភ្នំពេញ។ អាជីពការងាររបស់ គីរី ចាប់ផ្តើមនៅទីក្រុងភ្នំពេញ នៃប្រទេសកម្ពុជា ជាកន្លែងដែលគាត់បានបង្រៀនមុខវិជ្ជាជំនាញ (ហ្គីតា) ហើយវាជាមុខវិជ្ជាពេញនិយមមួយ។

បន្ទាប់ពីបានបញ្ចប់ការរៀនជាវគ្គខ្លីៗអំពីជំនាញនេះ តាមរយៈមិត្តភក្តី និងនៅតាមបណ្តាសាលានានា គីរី បានចេញសម្តែងនៅក្នុងកម្មវិធីផ្សេងៗ ដោយលក្ខណៈជាក្រុមផង និងម្នាក់ឯងផង។ បន្ទាប់មក គីរី បានបើកថ្នាក់បង្រៀនជាលក្ខណៈឯកជន ដូចជានៅផ្ទះរបស់គាត់ផ្ទាល់ និងនៅតាមទីកន្លែងដែលសិស្សបានកំណត់ឱ្យ លើសពីនោះ គីរី ក៏ធ្លាប់បានបង្រៀននៅអង្គការមួយក្នុងទីក្រុងភ្នំពេញផងដែរ។

នៅចុងឆ្នាំ២០១៤ គីរី បានដាក់ពាក្យចូលបំរើការងារនៅ សាលារៀន អន្តរទ្វីប អាមេរិកាំង។ គីរី ក៏បានបង្កើតនូវកម្មវិធីសិក្សាអនឡាញ ដើម្បីជួយដល់សិស្សានុសិស្សតាមរយៈយូធូប ហ្វេសប៊ុក និងបានបង្រៀនឱ្យសិស្សរៀនស្រាវជ្រាវរកអ្វីថ្មីដើម្បីយកមកចែករំលែកក្នុងថ្នាក់រៀន។ សព្វថ្ងៃ គីរី បាននិងកំពុងបន្តអាជីពរបស់ខ្លួននៅសាលារៀន អន្តរទ្វីប អាមេរិកាំង។

ប៉ែន តេង

គ្រូបង្រៀនគណិតវិទ្យា

ជាគ្រូបង្រៀនគណិតវិទ្យាម្នាក់ដែលជាអ្នកផ្តល់ចំណេះដឹងដល់សិស្ស ខ្ញុំបាទតែងតែប្រឹងប្រែងអស់ពីកម្លាំងចិត្ត និងកម្លាំងកាយ ដើម្បីឱ្យសិស្សទទួលបានជោគជ័យក្នុងការសិក្សា។ ការណ៍នេះ ក៏ដោយសារតែវាជាឧបនិស្ស័យដែលតែងតែស្រឡាញ់ការអប់រំតាំងតែពីតូចមក និងតែងតែស្រមៃថានឹងក្លាយជាគ្រូបង្រៀនម្នាក់ទៅថ្ងៃអនាគតនោះឯង។

កាលពីឆ្នាំ២០០២ ក្រោយពីបានប្រឡងបញ្ចប់ គរុកោសល្យភូមិភាគហ៊ុនសែនខេត្តកណ្តាល ខ្ញុំបានប្រឡូកចូលបម្រើការងារជាមន្ត្រីរាជការស៊ីវិលក្របខណ្ឌផ្នែកអប់រំរបស់ក្រសួងអប់រំយុវជន និងកីឡា ដោយចាប់ផ្តើមការងារនៅវិទ្យាល័យហ៊ុនសែនសិរីដីដុះ រហូតមកដល់សព្វថ្ងៃនេះ។ ដោយមូលហេតុគិតថាប្រទេសជាតិមួយរីកចម្រើន គឺដោយសារសង្គមនោះពោរពេញទៅដោយធនធានមនុស្សប្រកបទៅដោយសក្តានុពល ដូចនេះការរួមចំណែករបស់ខ្ញុំបាទ ពិតជាពោរពេញទៅដោយមោទកភាពខ្លាំងណាស់។

ការអភិវឌ្ឍ និងមានមហិច្ឆតារបស់ខ្លួនមិនបានបញ្ចប់ត្រឹមនេះ នៅតែបន្តក្នុងការសិក្សារបស់ខ្លួនទៀត រហូតបានបញ្ចប់បរិញ្ញាបត្រផ្នែកអក្សសាស្រ្តអង់គ្លេសនៅសកលវិទ្យាល័យធនធានមនុស្ស ឆ្នាំ២០១០ និងបរិញ្ញាត្រគណិតវិទ្យានៅសកលវិទ្យាល័យខេមរៈ នៅឆ្នាំ២០១៣។ ក្នុងនោះផងដែរនៅ

ឆ្នាំ២០០៧ ខ្ញុំបាទបានបន្តកាន់តែស៊ីជម្រៅទៅក្នុងការងារអប់រំនេះដោយបានចូលបំរើការងាក្នុងគ្រឹះស្ថានអប់រំឯកជនមួយ គឺសាលារៀន អន្តរទ្វីប អាមេរិកាំង ដែលជាគ្រឹះស្ថានអប់រំដ៏ល្បីល្បាញ និងមានកេរ្តិ៍ឈ្មោះល្បីសុះសាយពេញទូទាំងប្រទេលខាងផ្នែក វិន័យគុណភាពនិងសេវាកម្មបានក្លាយជាទីតាំងការងារទីពីរដ៏កក់ក្តៅរបស់ខ្ញុំបាទ។

ការប្រឡូកក្នុងការងារទាំងអស់ នេះបានធ្វើឱ្យខ្ញុំបាទបានសិក្សា និងដកយកបទពិសោធថ្មីៗជាច្រើនរាប់មិនអស់ពីគ្នាទៅវិញទៅមករវាងបុគ្គលិក និងបុគ្គលិក បុគ្គលិក និងថ្នាក់ដឹកនាំ សម្រាប់យកទៅអនុវត្តក្នុងការបង្រៀនដល់សិស្ស ព្រោះការបង្រៀនមិនមែនបង្រៀនតែចំណេះដឹងទូទៅប៉ុណ្ណោះទេថែមទាំងបង្កើតកម្មវិធីផ្សេងៗជាច្រើនទៀតដូចជា កម្មវិធីចុះជួយសង្គម (លាបថ្នាំ ដាំផ្កា) ដំណើរទស្សនកិច្ចសិក្សារបស់សិស្សនៅខេត្តនាៗ ដើម្បីឱ្យសិស្សមានឱកាសស្វែងយល់ពីសង្គមខាងក្រៅ និងសិក្ខាសាលាជាដើម ជាពិសេសកម្មវិធីបរិស្ថាន សាលាតែងតែដឹកនាំ សិស្សានុសិស្សទាំងអស់ រួមទាំងបុគ្គលិក សម្អាតបរិស្ថាបនៅក្នុងសាលា និងទីតាំងផ្សេងៗ។ ទោះបីទំហំការងារកាន់តែរីកធំ តែខ្លួនខ្ញុំពេញចិត្តនឹងទទួលពីអ្វីដែលថ្មីៗពីការងារទាំងនោះ ព្រោះការងារទាំងអស់នេះហើយដែលបានជម្រុញចិត្តរបស់ខ្ញុំឱ្យខិតខំប្រឹងប្រែង និងមានទំនួលខុសត្រូវខ្ពស់លើមនសិការវិជ្ជាជីវៈរបស់ខ្លួនថែមទៀត។

ខ្ញុំប្តេជ្ញាថានឹងខិតខំបំពេញតាមតួនាទីរបស់ខ្លួនឱ្យរឹតតែល្អតទៅទៀត ពិសេសលើការសិក្សាស្រាវជ្រាវនូវអ្វីៗដែលថ្មីៗដើម្បីយកមកបង្ហាត់បង្ហាញសិស្សឱ្យសិស្សមានសកម្មភាពរស់រវើកក្នុងការរៀន។ ហើយធានាឱ្យបាននូវដំណើរការរៀននិងបង្រៀនប្រកបដោយប្រសិទ្ធភាពខ្ពស់តាមការរំពឹងទុក។ លើសពីនេះទៅទៀត គឺការកសាងខ្លួនក៏ដូចជាក្មេងៗជំនាន់ក្រោយឱ្យក្លាយជាសសរទ្រូងដ៏រឹងមាំក្នុងកិច្ចរួមចំណែកទ្រទ្រង់ ក៏ដូចជាការអភិវឌ្ឍជាតិបស់យើងឱ្យកាន់តែលូតលាស់ទៅមុខប្រកបដោយភាពរីកចម្រើននៃសម័យកាលក្នុងសង្គមបច្ចុប្បន្នថ្មីៗយើងថែមទៀត។

សូមអរគុណ

ពូន វាសនា

គ្រូបង្រៀនខាងចំណេះដឹងទូទៅ

ខ្ញុំបាទឈ្មោះ ពូន វាសនា ភេទប្រុស កើតថ្ងៃ០៩ ខែតុលា ឆ្នាំ១៩៧១។ ខ្ញុំបាទបានចាប់យកអាជីពជាគ្រូបង្រៀនចាប់តាំងពីថ្ងៃទី១៥ ខែកុម្ភៈ ឆ្នាំ១៩៩៤ រហូតមកដល់បច្ចុប្បន្ន។ ការដែលចាប់យកអាជីពជាគ្រូបង្រៀននេះ ដោយសារតែចំណង់ចំណូលចិត្ត ការស្រលាញ់ពេញចិត្តនៅក្នុងវិស័យអប់រំនេះ។ ម៉្យាងវិញទៀតចង់ផ្តល់នូវអ្វីជាចំណេះដឹងរបស់ខ្លួនដែលមានផ្តល់ឱ្យក្មេងៗ ដើម្បីឱ្យពួកគាត់មានចំណេះវិជ្ជាគ្រប់ៗគ្នា។ ដោយមានការយល់ឃើញថាចំណេះវិជ្ជា គឺជាយានចម្លងពួកគេឱ្យគេចផុតពីអនក្ខរភាព។

កាលណាមនុស្សមានចំណេះវិជ្ជាគ្រប់គ្នា ប្រទេសនឹងមានការរីកចម្រើនអភិវឌ្ឍន៍បានយ៉ាងឆាប់រហ័ស។ អាស្រ័យដោយនិន្នាការទោរទន់ទៅកាន់វិស័យអប់រំ ខ្ញុំក៏បានចូលរួមប្រឡូក និងបម្រើការជាគ្រូបង្រៀននៅក្នុងសាលាឯកជនមួយដែលមានឈ្មោះថា សាលាភាសាខ្មែរ ចិន អង់គ្លេស អៀក ឃុង។ ក្រោយមកទៀតនៅឆ្នាំ១៩៩៧ បានផ្លាស់មកបម្រើការជាគ្រូបង្រៀននៅវិទ្យាល័យ លិប ឃុន និងក៏ធ្លាប់ជាគ្រូបង្រៀនក្រៅម៉ោងនៅសាលាភាសាបរទេសផ្សេងៗទៀតផងដែរ។

ដោយមើលឃើញថាសាលារៀន អន្តរទ្វីប អាមេរិកាំង ជាសាលាគំរូមួយឈានមុខគេមានការដឹកនាំដ៏ល្អ ដែលមានវិន័យតឹងរឹង គុណធម៌ល្អ ពោរពេញទៅដោយគុណភាពអប់រំខ្ពស់ ហើយមានការរីកចម្រើនជាលំដាប់ពីមួយឆ្នាំទៅមួយឆ្នាំផងនោះ ខ្ញុំក៏បានសម្រេចចិត្តចូលរួមបម្រើការងារជាគ្រូបង្រៀនខាងចំណេះដឹងទូទៅផ្នែកបឋមសិក្សាចាប់តាំងពីថ្ងៃទី១៤ ខែកញ្ញា ឆ្នាំ២០១៥ រហូតមកដល់ពេលបច្ចុប្បន្ននេះ។

ការកសាងជីវិតជាគ្រូបង្រៀននៅទីនេះមានការសប្បាយចិត្តយ៉ាងខ្លាំង ពីព្រោះនៅទីនេះមានបរិស្ថានល្អ មានបរិយាកាសស្រស់ថ្លា ហើយមានការដឹកនាំប្រកបដោយសុច្ឆន្ទៈ ជាពិសេសគណៈគ្រប់គ្រងសាលាមានការសហការគ្នាបានល្អប្រសើរ មានទំនាក់ទំនងការងារបានល្អជាមួយបុគ្គលិកគ្រប់ជាន់ថ្នាក់ដោយមានការពិភាក្សា និងដោះស្រាយការងារផ្សេងៗ។ ការងារនៅទីនេះមានការលើកទឹកចិត្តដល់បុគ្គលិកទាំងអស់ ជាហេតុធ្វើឱ្យខ្ញុំមានការរីកចម្រើនយ៉ាងខ្លាំងបន្ថែមទៅលើអ្វីដែលជាចំណេះដឹងដែលខ្ញុំមានពីមុន។

ចំណេះដឹងទាំងអស់បានមកពីការខិតខំប្រឹងប្រែងយកចិត្តទុកដាក់ចំពោះខ្លួនឯងផ្ទាល់មួយចំណែក ហើយក៏ជាការជំរុញយ៉ាងមុតមាំពីសំណាក់លោកប្រធាន និងគណៈគ្រប់គ្រងទាំងអស់ដែលបានយកចិត្តទុកដាក់ចំពោះបុគ្គលិក និងជួយជំរុញបន្ថែមដើម្បីឱ្យបុគ្គលិកកាន់តែមានការរីកចម្រើនផ្នែកចំណេះដឹងទូទៅ ដោយលោកបានបង្កើតឱ្យមាននូវសិក្ខាសាលា និងដំណើរទស្សនកិច្ចសិក្សាផ្សេងៗដើម្បីឱ្យបុគ្គលិកកាន់តែវិវឌ្ឍចំណេះដឹង។

កត្តាទាំងអស់នេះហើយបានជំរុញចិត្តរបស់ខ្ញុំឱ្យខិតខំបម្រើការងារឱ្យអស់ពីកម្លាំងកាយចិត្តក្នុងវិស័យអប់រំ ដោយបង្រៀនសិស្សឱ្យយកចិត្តទុកដាក់ខិតខំរៀនសូត្រ និងមានសុជីរធម៌ល្អ។ មួយវិញទៀតខ្ញុំសូមប្តេជ្ញាថានឹងខិតខំបំពេញតួនាទីរបស់ខ្លួនឱ្យកាន់តែបានល្អបន្ថែមទៀត ដោយព្យាយាមសិក្សាស្រាវជ្រាវនូវអ្វីៗដែលថ្មី ដើម្បីក្រេបយកចំណេះដឹងទាំងអស់មកបម្រើក្នុងកិច្ចការបង្រៀននិងអប់រំដល់សិស្សានុសិស្សទាំងអស់ឱ្យកាន់តែមានការរីកចម្រើនទាន់សម័យកាល។

រឹតតែពិសេសជាងនេះទៅទៀត គឺការកសាងខ្លួនឱ្យមានការអភិវឌ្ឍបានយ៉ាងល្អទាំងចំណេះដឹង និងការអនុវត្តដើម្បីបង្ហាត់សិស្សានុសិស្សឱ្យក្លាយជាមិត្តល្អ សិស្សល្អ និងកូនល្អ ដើម្បីឱ្យក្លាយជាសសរទ្រូងរបស់ប្រទេសជាតិក្នុងការរួមចំណែកកសាងប្រទេសឱ្យមានការអភិវឌ្ឍបានយ៉ាងឆាប់រហ័ស។

ស្រ៊ឺ ចាន់ផល

គ្រូបឋមសិក្សា

ជាកូនប្រុសទី១ នៅក្នុងគ្រួសារដែលមានប្អូន៣នាក់ និងមានឪពុកម្ដាយជាកសិករ។ បន្ទាប់ពីបានបញ្ចប់ការសិក្សាចំណេះទូទៅថ្នាក់មធ្យមសិក្សាទុតិយភូមិ។ ចាន់ផល បានចូលរៀននៅសាលាគរុកោសល្យ និងវិក្រឹត្យការខេត្តកណ្ដាល ផ្នែកគ្រូបឋមសិក្សានៅឆ្នាំ២០០៤ ហើយបានបញ្ចប់ការសិក្សាដោយជោគជ័យនៅឆ្នាំ២០០៦។ បន្ទាប់ពីនោះ ចាន់ផល បានក្លាយជាគ្រូបង្រៀននៅសាលាបឋមសិក្សាមួយកន្លែងនៅជនបទ។ បន្ទាប់ពីបានបង្រៀនសិស្សនៅបឋមសិក្សាអស់រយៈពេល២ឆ្នាំ លោកគ្រូ ចាន់ផល បានមកបន្តការសិក្សានៅរាជធានីភ្នំពេញនៅក្នុងសាកលវិទ្យាល័យ ចំរើនពហុបច្ចេកវិទ្យាផ្នែកវិទ្យាសាស្ត្រអប់រំ ចាប់ពីឆ្នាំ២០០៨ ដែលមានរយៈពេល៤ឆ្នាំ។

ក្នុងកំឡុងពេលសិក្សានៅសាកលវិទ្យាល័យ លោកគ្រូ ចាន់ផល ក៏បានចូលមកបម្រើការងារ ជាគ្រូបឋមសិក្សានៅសាលារៀនឯកជនមួយ មានដែលមានឈ្មោះល្បីនៅក្នុងរាជធានីភ្នំពេញ គឺសាលារៀន អន្តរទ្វីប អាមេរិកាំង ចាប់ពីថ្ងៃទី០១ ខែតុលា ឆ្នាំ២០១០។ ដោយសារមានចិត្តស្រឡាញ់ការងារអប់រំ និងជួយបណ្ដុះបណ្ដាល់ក្មេងជំនាន់ក្រោយឱ្យមានចំណេះដឹង ដើម្បីជួយអភិវឌ្ឍប្រទេសជាតិ លោកគ្រូ ចាន់ផល មិនដែលធ្វេសប្រហែស ក្នុងការងារនោះទេ គឺលោកគ្រូតែងតែយកចិត្តទុកដាក់ក្នុងការបង្រៀនសិស្ស គោរពពេលវេលាការងារ ខិតខំរកវិធីសាស្រ្តថ្មីៗក្នុងការបង្រៀនសិស្សឱ្យឆាប់យល់ និងឆាប់ចេះ។ មិនតែប៉ុណ្ណោះ លោកគ្រូ ចាន់ផល តែងតែមានទំនាក់ទំនងល្អជាមួយសិស្ស មិត្តរួមការងារ និងថ្នាក់ដឹកនាំស្ថាប័នផងដែរ។ ពិសេសទៀតលោកគ្រូ ក៏ចូលចិត្តចែករំលែកបទពិសោធផ្សេងៗ ដល់លោកគ្រូ អ្នកគ្រូដទៃទៀតផងដែរដូចជា ការចែករំលែកវិធីសាស្ត្របង្រៀន និងការងារផ្សេងៗទៀត ហើយលោកគ្រូ ត្រូវបានថ្នាក់ដឹកនាំជ្រើសតាំងជាបុគ្គលិកឆ្នើមប្រចាំឆ្នាំ។

អុឹម រ៉ានី

គ្រូបង្រៀនគីមីវិទ្យា

ចាប់ផ្តើមអាជីពជាគ្រូបង្រៀនកម្រិតឧត្តមនៅឆ្នាំ២០០៨ នៅវិទ្យាល័យមិត្តភាពខ្មែរជប៉ុនសាមគ្គីមានជ័យខេត្តកំពង់ឆ្នាំង។ ដោយចាប់ពីសមាជិកក្រុមបច្ចេកទេសនៅឆ្នាំ២០១០ បានក្លាយជាប្រធានក្រុមបច្ចេកទេសមុខវិជ្ជាគីមីវិទ្យា។ នៅឆ្នាំ២០១៣ បានទទួលអាហារូបករណ៍ទៅសិក្សាបរិញ្ញាបត្រជាន់ខ្ពស់អប់រំវិទ្យាសាស្ត្រនៅទីក្រុងហ៊ីរ៉ូស៊ីម៉ា ប្រទេសជប៉ុន រយៈពេលពីរឆ្នាំកន្លះ។

នៅឆ្នាំ២០១៥ បានចាប់ផ្តើមការងារនៅសាលារៀន អន្តរទ្វីប អាមេរិកាំង សាខាម៉ៅសេទុង។ នៅឆ្នាំ២០១៦ បានផ្លាស់ប្តូរទីកន្លែងធ្វើការពីវិទ្យាល័យមកវិទ្យាស្ថានជាតិអប់រំ ក្នុងឋានៈជាបុគ្គលិកការិយាល័យនៅដេប៉ាតឺម៉ង់អប់រំ។ បន្ទាប់ពីបានធ្វើការចំនួនមួយឆ្នាំត្រូវបានតម្លើងជាគ្រូឧទ្ទេសគីមីវិទ្យា និងជាប្រធានក្រុមបច្ចេកទេស។ នៅឆ្នាំ២០១៧បានផ្លាស់ប្តូរពីសាខាម៉ៅសេទុងមកធ្វើការនៅសាលារៀន អន្តរទ្វីប អាមេរិកាំង សាខាទួលគោក។

គាក ម៉ាណែត

គ្រូបង្រៀនមុខវិជ្ជាអក្សរសាស្រ្តខ្មែរ និងជាគ្រូបន្ទុកថ្នាក់

គាត់ជាគ្រូបង្រៀនមុខវិជ្ជាអក្សរសាស្រ្តខ្មែរ និងជាគ្រូបន្ទុកថ្នាក់ នៅសាលារៀន អន្តរទ្វីប អាមេរិកាំង សាខាម៉ៅសេទុង តាំងពីថ្ងៃទី២៨ ខែធ្នូ ឆ្នាំ២០០៨ រហូតមកដល់បច្ចុប្បន្ន។ ក្រោយពីបញ្ចប់ការសិក្សាថ្នាក់បរិញ្ញាបត្រអក្សរសាស្រ្តខ្មែរនៅសាកលវិទ្យាល័យភូមិន្ទភ្នំពេញ នៅឆ្នាំ២០០៣ និងឆ្លងកាត់វគ្គបណ្តុះបណ្តាលគ្រូឧត្តមកម្រិតឧត្តម បរិញ្ញា+១ នៅវិទ្យាស្ថានជាតិអប់រំ គាត់បានបំពេញតួនាទីជាគ្រូបង្រៀនរហូតមក។

ដោយសារក្តីពេញចិត្តអាជីពជាគ្រូបង្រៀន ព្រមទាំងទទួលបានបង្ហាត់បង្ហាញពីថ្នាក់គណៈកម្មការសាលារៀន អន្តរទ្វីប អាមេរិកាំង ជាមួយនឹងការផ្តល់ឱកាសចូលរួមសិក្ខាសាលាទាក់ទងនឹងបច្ចេកទេស ចិត្តសាស្រ្ត ការគ្រប់គ្រង បច្ចេកវិទ្យា កិច្ចការរដ្ឋបាល ការច្នៃប្រឌិត ការចូលរួមសហគមន៍ ក៏ដូចជាការតាំងចិត្ត សេចក្តីព្យាយាម កិច្ចសហការក្នុងក្រុមការងារ។ ទាំងនេះជាកត្តាញ៉ាំងឱ្យគាត់មានភាពរីកចម្រើនបន្តិចម្តងៗ រហូតក្លាយជាមនុស្សម្នាក់ដែលចង់ពង្រីកសមត្ថភាព ចំណេះដឹងឱ្យកាន់តែទូលំទូលាយជាងមុន។ ដើម្បីសម្រេចគោលដៅនេះគាត់បានឆ្លៀតពេលវេលាថ្ងៃឈប់សម្រាក បន្តការសិក្សា និងបញ្ចប់ថ្នាក់បរិញ្ញាបត្រជាន់ខ្ពស់ផ្នែកអក្សរសាស្រ្តខ្មែរក្នុងឆ្នាំ២០១៣។

អ្វីដែលធ្វើឱ្យមានការប្រឹងប្រែងបំពេញតួនាទីការងារបានល្អប្រសើរ គឺដោយសារកត្តាចូលរួមជាច្រើនដូចជា ការលើកទឹកចិត្ត ការផ្តល់ឱកាស ការផ្តល់ជាមតិយោបល់កែលំអ ការតម្រង់ទិស កិច្ចសហការក្នុងក្រុម ជាពិសេសគឺបុគ្គលផ្ទាល់ត្រូវមានឆន្ទៈ ទំនួលខុសត្រូវ គោរពច្បាប់ទម្លាប់ ទទួលយកមតិយោបល់អ្នកដទៃមកគិតពិចារណាពីចំណុចអសកម្មដែលខ្លួន ដើម្បីដុសខាត់កែច្នៃខ្លួនយើងឱ្យកាន់តែប្រសើរបន្ថែមទៀត។

យើងនឹងបង្ហាញគ្រូឆ្នើមមួយចំនួនដូចខាងក្រោម៖

អ៊ុក ច័ន្ទដារ៉ា

សាន សុធាន

រឿង គីរី

ប៉ែន តេង

ពូន វាសនា

ស្រ៊ឺ ចាន់ផល

លោក ជឹង ប៊ុនរ៉ា

ឥន សូហ្វីយ៉ា

អុឹម រ៉ានី

ជា ចាន់ស្រីរត័្ន

គាក ម៉ាណែត

អ៊ុក ច័ន្ទដារ៉ា

គ្រូបង្រៀនភាសាខ្មែរ

សាន សុធាន

គ្រូបង្រៀនកុំព្យូទ័រ

រឿង គីរី

គ្រូបង្រៀនមុខវិជ្ជាជំនាញ

ប៉ែន តេង

គ្រូបង្រៀនគណិតវិទ្យា

ពូន វាសនា

​គ្រូបង្រៀន​ខាង​ចំណេះដឹង​ទូទៅ​

ស្រ៊ឺ ចាន់ផល

គ្រូប​ឋមសិ​ក្សា

លោក ជឹង ប៊ុនរ៉ា

គ្រូបង្រៀនគណិតវិទ្យា

ឥន សូហ្វីយ៉ា

គ្រូបឋមសិក្សា

អុឹម រ៉ានី

គ្រូបង្រៀនគីមីវិទ្យា

ជា ចាន់ស្រីរត័្ន

គ្រូបង្រៀនភាសាអង់គ្លេស

គាក ម៉ាណែត

គ្រូបង្រៀនមុខវិជ្ជាអក្សរសាស្រ្តខ្មែរ និងជាគ្រូបន្ទុកថ្នាក់

គ្រូបង្រៀនខាងចំណេះដឹងទូទៅ

គ្រូបឋមសិក្សា