កិច្ចប្រជុំតម្រង់ទិសស្ដីពី​ដំណើរ​ទស្សន​កិច្ច​សិក្សា​នៅ​ខេត្ត​​សៀមរាប លើកទី១០៨

កាលពីថ្ងៃទី១៣​ ខែមិថុនា ឆ្នាំ២០១៧ កន្លងទៅនេះ គណៈ​គ្រប់គ្រង​សាលារៀន​ ​អន្តរទ្វីប​ ​អាមេរិកាំង​ ​បាន​បើក​កិច្ចប្រជុំ​តម្រង់ទិស​ពី​​ដំណើរទស្សនកិច្ចសិក្សានៅខេត្តសៀមរាប លើកទី១០៨ នៅ​សាលប្រជុំ​ ​សូវ​ ​ហុងគុយ​ ​នៃសាលារៀន​ អន្តរទ្វីប​ ​អាមេរិកាំង​ ​សាខា​ម៉ៅសេទុង សម្រាប់សិស្សថ្នាក់ទី១២ទាំងអស់។ទស្សនកិច្ចសិក្សា​លើក​នេះ​ គឺ​មាន​រយៈ​ពេល​៤ថ្ងៃ​ ​ពោល​ចាប់​ពីថ្ងៃ​ទី២១​ ​ដល់​ថ្ងៃទី២៤​ ​ខែមិថុនា​ ឆ្នាំ​២០១៧ ​ដោយ​ថ្ងៃ​ទី១​ ​នឹង​ចេញ​ដំណើរ​ពី​ភ្នំពេញ​ ​នៅ​ព្រឹក​ព្រលឹម​ ឆ្ពោះ​កាត់តាម​ខេត្ត​កំពង់ធំ​ ​ដោយ​ឆៀង​ចូល​ទស្សនា​រមណីយដ្ឋាន​ ​និង​ប្រាសាទ​សម្បូរ​ព្រៃគុក​ ព្រមទាំង​ចែក​អំណោយ​សម្បុរធម៌​ដល់​សិស្សានុសិស្ស​ ​សាលា​បឋមសិក្សា​មហរ​ ​ជាង៣០០នាក់​ ​ផងដែរ​ ​ទើប​បន្តដំណើរ​​ទៅ​ទស្សនា​កសិដ្ឋាន​ចិញ្ចឹម​ដង្កូវ​នាង​ថែមទៀត​។​នៅរសៀលថ្ងៃដដែល ទើបបន្តដំណើរទៅកាន់​ខេត្តសៀមរាប​​ ដើម្បី​សម្រាក​នៅ​ទីនោះ។​ នៅព្រឹក​​ថ្ងៃទី២​ នឹង​ចេញ​ដំណើរ​ទៅ​ទស្សនា​ប្រាសាទអង្គរតូច​ ​​​លុះ​​ពេល​រសៀល​ទៅ​ទស្សនា​សប្បកម្មអង្គរ​ ​និង​ផ្សាររាត្រី។​​ ដោយឡែកថ្ងៃទី៣ នៅម៉ោង៨​ព្រឹក បន្ដ​ដំណើរទៅកាន់តំបន់​ប្រវត្តិសាស្ត្រ​ជាច្រើន​ទៀត​ដូចជា​ ​ប្រាសាទអង្គរធំ​ ​ប្រាសាទតាព្រហ្ម​ និង​រសៀល​ឆ្ពោះ​ទៅ​ទស្សនា​ទន្លេអុំ​ ​ប្រាសាទ​បក្សីចាំក្រុង​ ​និងប្រាសាទ​បាខែង​ជាដើម។​ ​នៅ​ថ្ងៃ​ទី៤​ ដែលជាថ្ងៃ​ចុង​បញ្ចប់​នៃ​ដំណើរ​ទស្សនកិច្ច​សិក្សា​នេះ​ ពោល​នៅ​ព្រឹក​ម៉ោង៨​ ​នឹង​ចេញ​ទៅ​ព្រះអង្គចេក​ ​ព្រះអង្គចម​ ​សារមន្ទីរ​ Angkor Panorama​ និង​វេលា​រសៀល​វិល​ត្រឡប់​មក​កាន់​រាជធានី​ភ្នំពេញ​វិញ។​ សិស្សានុសិស្សដែលចូលរួមដំណើរទស្សនកិច្ចនេះ​ ​មិន​ត្រូវ​អនុញ្ញាត​ដូចជា​ពាក់​នូវ​គ្រឿង​អលង្ការ​មាន​តម្លៃ​ នាំ​ជាមួយ​នូវ​គ្រឿងស្រវឹង​ ​អាវុធ​ជាតិផ្ទុះ​ ​និង​ហាម​លេង​ល្បែង​ស៊ីសង​គ្រប់​ប្រភេទ។​