គណៈប្រតិភូអធិការកិច្ច នៃមន្ទីអប់រំ យុវជន និងកីឡារាជធានីភ្នំពេញចុះពិនិត្យ និងវាយតម្លៃ នៅសាលារៀន អន្តរទ្វីប អាមេរិកាំង សាខាម៉ៅសេទុង

កាលពីថ្ងៃទី៥ ខែមករា ឆ្នាំ២០១៨ កន្លងទៅនេះគណៈកម្មាធិការអធិការកិច្ចរបស់មន្ទីរអប់រំ យុវជន និងកីឡា បានចុះមកពិនិត្យ និងធ្វើការវាយតម្លៃ សាលារៀន អន្តរទ្វីប អាមរិកាំង សាខា​ម៉ៅ​សេទុង ទៅលើរចនាសម្ពន្ធ ការគ្រប់គ្រង បរិស្ថាន រដ្ឋបាល បណ្ណាល័យ និងបច្ចេកទេសបង្រៀនរបល់លោកគ្រូ​ អ្នកគ្រូ នៅ​មធ្យម​សិក្សា។ ការបូកសរុក និងវាយតម្លៃពីអធិការកិច្ច បានបង្ហាញថា សាលារៀន អន្តរទ្វីប អាមេរិកាំងធ្វើបានល្អប្រសើរគ្រប់ផ្នែកស្ទើរតែរកចំណុចអវជ្ជមាន ឬន្លោះប្រហោងគ្មាន។ អ្នកតំណាងឱ្យគណៈកម្មាធិការអធិការកិច្ចរបស់មន្ទីរអប់រំ យុវជន និងកីឡា បាន​បន្ត​ថា លទ្ធផល​ដ៏​ល្អ​នេះពិត​ជា​បាន​ចូលរួមអភិវឌ្ឍ​វិស័យ​អប់រំ អភិវឌ្ឍ​ធនធាន​មនុស្ស សម្រាប់​ប្រទេសជាតិ​ទាំងមូល ដើម្បី​ឈាន​ចូល​សហគមន៍​អាស៊ាន និង​អន្តរជាតិ។ ទន្ទឹម​នឹង​ការរីក​ចម្រើន​នេះ ក្រុម​ការងារ​មន្ទីរ​អប់រំ បាន​លើក​ទឹក​ចិត្ត​ដល់​គណៈគ្រប់គ្រង​សាលារៀន​ លោកគ្រូ អ្នកគ្រូ និង​បុគ្គលិក​គ្រប់​ផ្នែក​ទាំង​អស់ គួរ​តែ​បន្ត​ពង្រឹង និង​អភិវឌ្ឍ​ទៅ​មុន​បន្ថែម​ទៀត​ ដើម្បី​ចូល​រួម​បណ្ដុះ​បណ្ដាល​ធនធាន​មនុស្ស​ប្រកប​ដោយ​គុណភាព និង​ប្រសិទ្ធភាព​អប់រំ​ក្នុងការ​ចូលរួម​កសាង​ប្រទេស​ជាតិ​កម្ពុជា​ឱ្យ​រីក​ចម្រើន​ទៅ​ថ្ងៃ​អនាគត។ ក្នុង​ឱកាស​នោះ​ដែរ លោកស្រី រស់ យ៉ាណា អនុប្រធាន​សាលារៀន អន្តរទ្វីប អាមេរិកាំង បាន​លើក​ឡើង​ថា សាលារៀន ពិត​ជា​មាន​កិត្តិយស និង​រីករាយ​បំផុត​នូវ​ប្រសាសន៍ល្អៗ​របស់​ក្រុមការងារ​ការិយាល័យ​ផ្នែក​មធ្យម​សិក្សា។ ព្រោះថា​ពី​មួយ​ឆ្នាំ​ទៅ​មួយ​ឆ្នាំ​ សាលារៀន​កាន់​តែ​រីក​ចម្រើន ល្បីល្បាញ និង​មាន​ការ​គាំទ្រពី​មហាជន​យ៉ាង​ផុសផុល​នេះ ក៏​ទទួល​បាន​ការ​ចង្អុល​បង្ហាញ​ផ្លូវ​ពី​មន្ទីរ​អប់រំ យុវជន និង​កីឡា នូវ​ចំណុច​ខ្វះខាត និង​អ្វី​ដែល​ត្រូវ​ចាក់​បំពេញ​បន្ថែម​ ដើម្បី​គុណភាព​អប់រំ​នៅ​កម្ពុជា។