ជីវិតនៅលីវ និងមានគ្រួសារ

ជាទូទៅជីវិតមនុស្សយើងម្នាក់ៗកើតមកមិនដូចគ្នានោះទេ ហើយដំណើរជីវិត និងភាពជោគជ័យក៏មិនដូចគ្នានោះ ដែរ។ ដោយមនុស្សភាគច្រើនចង់មានគ្រួសារ ហើយអ្នកខ្លះចង់មានជីវិតនៅលីវដោយភាពឯកាវាពិតជាគួរឱ្យ ខ្លាច និងមានអារម្មណ៍មួយថាវាពិតជាខ្វះភាពកក់ក្ដៅ រហូតមានមនុស្សមួយចំនួនយល់ថាទាល់តែមានដៃគូ ជីវិតទើបមានសុភមង្គល និងយល់ចិត្តគ្នា មើលថែគ្នាទើបមានក្ដីសុខពេញមួយជីវិតរបស់គេ។ ប៉ុន្តែនៅពេល ដែលពួកគេបានសាងគ្រួសាររួចហើយ ពួកគេទាំងនោះនៅតែមិនអាចបំពេញនូវសេក្ដីសុខសម្រាប់ខ្លួនឯងអស់ មួយជីវិតដូចដែលធ្លាប់បានគិតនោះទេ ពួកគេនៅតែមានរឿងថ្មីៗដែលជាបញ្ហាចូលមកជាបន្តបន្ទាប់មិនចេះចប់ មិនមិនចេះហើយ។ ខាងក្រោមនេះគឺជាភាពខុសគ្នារវាងជីវិតនៅលីវ និងមានគ្រួសារ៖

ជីវិតពេលនៅលីវ :

នៅពេលដែលយើងចាប់ផ្ដើមធំពេញវ័យចេះរស់នៅឆ្ងាយពីគ្រួសារ ឪពុកម្ដាយ លែងពឹងពាក់ពួកគាត់ និងចេះមាន ទំនួលខុសត្រូវលើខ្លួនឯងគ្រប់សព្វបែបយ៉ាង ហើយមានអារម្មណ៍មួយថាខ្លួនឯងកំពុងតែរស់នៅជាមួយនឹងភាព ឯកាគ្មានអ្នកយល់ចិត្ត មិនសប្បាយចិត្ត ជួបបញ្ហាត្រូវដោះស្រាយ និងប្រឹក្សាយោបល់ដោយខ្លួនឯង ទោះបីមាន មិត្តភក្តិស្និទ្ធស្នាល ក៏គេមិនអាចមានពេលកំដរយើងអស់មួយជីវិតបាននោះទេ។ ដូច្នេះហើយទើបមនុស្សម្នាក់ៗ តែងតែស្វែងរកដៃគូជីវិតដែលសាកសមដើម្បីដើរលើផ្លូវជីវិតជាមួយគ្នាក្នុងការស្វែងរកសុភមង្គល និងសេចក្ដីសុខ សម្រាប់ខ្លួន។ ប៉ុន្តែជីវិតពេលនៅលីវ មានមនុស្សមួយចំនួននៅបន្តភាពនៅលីវ ដោយមានហេតុផលរៀងៗខ្លួន ដោយមិនប្រាកដថា មានភាពឯកា ឬមិនមានអ្នកត្រូវការនោះទេ។ ជីវិតពេលនៅលីវមានគុណសម្បត្តិមួយចំនួនដូចជា មានមិត្តភក្ដិច្រើន ជួយដោះស្រាយបញ្ហាមិត្តភកិ្ត ផ្តល់ជំនួយដល់ឪពុកម្តាយ អាចបង្កើតកម្រិតទំនាក់ទំនង បានច្រើនទាំងបុរស និងស្ត្រី ជាពិសេសនៅថែរូបរាងឱ្យនៅតែស្អាតទាំងអស់នេះ ហើយធ្វើឱ្យជីវិតពេលនៅលីវ មានភាពកាន់តែសម្បាយរីករាយ។

ជីវិតមានគ្រួសារ :

សំដៅទៅមនុស្សមានដៃគូប្រចាំជីវិត ឬហៅថាអាពាហ៍ពិពាហ៍ ធ្វើឱ្យយើងមានទំនុកចិត្តលើខ្លួន អាចបំបាត់បញ្ហាស្ត្រេស ចេះតស៊ូ ពុះពារបញ្ហា តាមរយៈការចែករំលែកបញ្ហាទៅវិញទៅមក ដើម្បីជួយគ្នាស្វែងរកដំណោះស្រាយត្រឹមត្រូវ។ ប៉ុន្តែជីវិតមានគ្រួសារខ្លះប្រឈមបញ្ហាច្រើន មិនមែនគ្រប់ជីវិតអាពាហ៍ពិពាហ៍សុទ្ធតែបង្កើតសុភមង្គល ឬភាពសោកសៅនោះឡើយ កត្តាចម្បងគឺខ្លួនយើងផ្ទាល់ជាអ្នកគ្រប់គ្រង រៀបចំជីវិតអាពាហ៍ពិពាហ៍របស់យើង ឱ្យក្លាយជាជីវិតសប្បាយរីករាយពិតប្រាកដមួយ ហើយក៏មានគុណវិបត្តិដែរ។

សរុបសេចក្តីមកជីវិតនៅលីវ និងមានគ្រួសារ អ្វីដែលសំខាន់គឺត្រូវចេះរៀនទទួលស្គាល់ និងព្រមទទួលយក នូវអ្វីដែលជាការពិត បើសិនជាជីវិតនៅលីវត្រូវតែធ្វើចិត្តឱ្យសប្បាយ ព្រោះពេលនេះគឺជាឱកាសសម្រាប់យើងបាន បង្រៀនខ្លួនឯងឱ្យរឹងមាំ តែនៅពេលសម្រេចចិត្តរៀបការមានគ្រួសារហើយ ត្រូវចេះត្រៀមចិត្តទទួលយកនូវអ្វីគ្រប់យ៉ាងដែលវានឹងកើតឡើង និងជម្នះរាល់ឧបសគ្គទាំងអស់ជាមួយដៃគូជីវិតរបស់យើង៕

អត្ថបទដកស្រង់ និងកែសម្រួលចេញពីគេហទំព័រ៖

– https://news.sabay.com.kh/article/1047153…