ដំណើរកម្សាន្តតាមរថភ្លើង

អត្ថបទព័ត៌មានស្តីពីដំណើរកម្សាន្ត
ក្រោមប្រធានបទ “ដំណើរកម្សាន្តតាមរថភ្លើង”
អត្ថបទដកស្រង់ដោយ : ឃី គីមស្រៀ
#MJQE #AmericanInterconSchool

តើអ្នកធ្លាប់ធ្វើដំណើរតាមរថភ្លើងហើយឬនៅ? ហើយចង់សាកល្បងទេ? វាប្រហែលមិនមែនជារឿងថ្មីស្រឡាងនោះទេសម្រាប់អ្នកធ្លាប់ធ្វើដំណើរតាមរថភ្លើង ប៉ុន្តែវាអាចនឹងរឿងថ្មីសម្រាប់អ្នកដែលមិនធ្លាប់ធ្វើដំណើរតាមរថភ្លើង។ នៅពេលដែលយើងមានគម្រោងធ្វើដំណើរកម្សាន្តម្តងៗ គឺមានរឿងជាច្រើនដែលត្រូវរៀបចំ ប៉ុន្តែអ្វីដែលសំខាន់គឺមធ្យោបាយធ្វើដំណើរ។ យើងប្រាកដជាគិតថាតើគួរទៅកាន់ទីកន្លែងនោះដោយរបៀបណា? ប្រើយានជំនិះផ្ទាល់ខ្លួន ឬក៏ជួលរថយន្ត? បើមានយានជំនិះផ្ទាល់ខ្លួន តើអ្នកណាជាអ្នកបើក? និងចំណុចដទៃទៀត។ ហេតុអ្វីមិនសាកធ្វើដំណើរតាមរថភ្លើងរបស់ក្រុមហ៊ុន រ៉ូយាល់រ៉េលវ៉េ (Royal Railway) ដែលជាក្រុមហ៊ុនស្ថានីយរថភ្លើងដែលទើបនឹងដាក់ឱ្យដំណើរការមានទីតាំងគោលដៅតែមួយខ្សែប៉ុណ្ណោះ គឺចេញពីភ្នំពេញទៅកាន់៣ទីតាំងរួមមាន ខេត្តតាកែវ កំពត និងខេត្តព្រះសីហនុ។

ហេតុអ្វីគួរធ្វើដំណើរតាមរថភ្លើង?
អ្វីដែលសំខាន់ គឺអារម្មណ៍ប្លែកម្យ៉ាងតាមរយៈការមើលឃើញទេសភាពស្អាតៗទាក់ភ្នែក និងរំសាយអារម្មណ៍ជាច្រើនតាមដងផ្លូវរថភ្លើង។ ម្យ៉ាងទៀត ជំនួសឱ្យការធ្វើដំណើរតាមផ្លូវជាតិ រថភ្លើងនឹងធ្វើចរយាត្រានៅលើផ្លូវដែក ដែលប្រាកដណាស់គឺមានលក្ខណៈខុសគ្នាពីផ្លូវធម្មតា។ រឹតតែពិសេសទៀតនោះ គឺ ផាសុកភាពផ្លូវចិត្តដោយមិនចាំបាច់បារម្ភពីការកកស្ទះចរាចរណ៍ ឬហេតុការណ៍ណាមួយនោះឡើយ។ អ្នកទាំងអស់គ្នាអាចរួមដំណើរជាក្រុមគ្រួសារ ក៏ដូចជាមិត្តភក្តិ ជាពិសេសអ្នកដែលធ្លាប់មានតួនាទីជាតៃកុង អាចយកពេលវេលាធ្វើអ្វីផ្សេង និងសម្រាកតាមដងផ្លូវបានយ៉ាងរីករាយ។ មិនត្រឹមតែប៉ុណ្ណោះ លោកអ្នកក៏អាចយកយានជំនិះរបស់អ្នកទៅជាមួយ ដើម្បីបង្កភាពងាយស្រួលក្នុងការធ្វើដំណើរ ដោយពេលដែលដល់គោលដៅ ក៏មិនចាំបាច់បារម្ភអំពីការគ្មានមធ្យោបាយធ្វើដំណើរនោះដែរ។

មានគ្រឿងបរិក្ខារអ្វីខ្លះដែរ?
មិនចាំបាច់ខ្លាចថា ជិះចូលព្រៃហើយគ្មានសេវា Internet សម្រាប់ប្រើប្រាស់នោះឡើយ ព្រោះថានៅលើរថភ្លើងមានភ្ជាប់ប្រព័ន្ធ Wi-Fi។ ជាមួយគ្នានេះដែរ ក៏មានប្រព័ន្ធអគ្គិសនីដែលអាចប្រើប្រាស់បានតាមតម្រូវការ។ លើសពីនេះទៅទៀត ភេសជ្ជៈក៏មានផងដែរនៅលើរថភ្លើងនោះតែម្តង ដែលបង្កភាពងាយស្រួលដល់អ្នកដំណើរ។

រយៈពេលសេវាកម្ម និងតម្លៃគិតយ៉ាងដូចម្តេចវិញ?
ការធ្វើដំណើរពីភ្នំពេញទៅកាន់ខេត្តតាកែវមានរយៈពេលមួយម៉ោងកន្លះ តម្លៃ៤ដុល្លារ រីឯទៅកាន់ខេត្តកំពត មានរយៈពេលបួនម៉ោងកន្លះ តម្លៃ៦ដុល្លារ និងទៅកាន់ខេត្តព្រះសីហនុមានរយៈពេលប្រាំពីរម៉ោង តម្លៃ៧ដុល្លារ។ ចំពោះតម្លៃផ្ញើយានជំនិះវិញ គឺ១៤ដុល្លារសម្រាប់រថយន្ត ៥ដុល្លារសម្រាប់ម៉ូតូ និង២ដុល្លារសម្រាប់កង់។
គួរបញ្ជាក់ផងដែរថា ថ្ងៃដែលចេញដំណើរគឺមានតែថ្ងៃសុក្រ សៅរ៍ និងថ្ងៃអាទិត្យប៉ុណ្ណោះ។