ដំណើរកម្សាន្ត និងជីវិតប្រចាំថ្ងៃ

ពិភពលោកបច្ចុប្បន្នបានបើកបង្ហាញឱ្យមនុស្សក្នុងសង្គមឃើញតាមរយៈបច្ចេកវិទ្យានូវទិដ្ឋភាពជាក់ស្តែងដូចជា ទំនៀមទម្លាប់ របៀបនៃការរស់នៅ សម្ភារៈទំនើបៗ ទេសភាពប្លែកៗ រមណីយដ្ឋានកែច្នៃប្លែកៗ ភាពរីកចម្រើននៃបណ្តាប្រទេសស្ទើរពាសពេញសកលលោក និងបានទាក់ទាញមនុស្សគ្រប់ជាតិសាសន៍ ស្របពេលជាមួយធនធានមនុស្សដ៏សម្បូរបែបកំពុងតែប្រកួតប្រជែងសមត្ថភាពគ្នា ពង្រឹង និងអភិវឌ្ឍន៍ការងារគ្រប់វិស័យ។ ជារៀងរាល់ថ្ងៃមនុស្សម្នាក់ៗបំពេញការងារស្ទើរគ្មានពេលទំនេរ ជាការពិតណាស់រាល់ការងារមិនសុទ្ធតែរលូនទាំងអស់ទេ ដំណើរជីវិតក្នុងក្រុមគ្រួសារក៏មិនជួបសុខសប្បាយរហូតដែរ។ ដូចនេះត្រូវចេះច្នៃជីវិតរស់នៅ និងក្រុមគ្រួសារឱ្យមានរសជាតិតាមរបៀបនៃការរស់នៅរៀងៗខ្លួន ហេតុដូចនេះត្រូវមានដំណើរកម្សាន្តទៅតាមរបៀបនៃការរស់នៅ ចុះប្រជាពលរដ្ឋខ្មែរបច្ចុប្បន្នមានទំនោរបែបណាដែរទៅលើជីវិតប្រចាំថ្ងៃ និងដំណើរកម្សាន្ត។

សង្គមខ្មែរបច្ចុប្បន្នមានសន្តិភាពពេញលេញ និងបានផ្តល់ឱកាសឱ្យមនុស្សមានការងារធ្វើសម្បូរបែបនៅទីប្រជុំជនគ្រប់រាជធានីខេត្ត ឯការប្រកួតប្រជែងទីផ្សារក៏មានច្រើន ដូចនេះអ្នកមានសមត្ថភាពបំពេញការងារមានជីវភាពធូរធារ ហើយមានមោទកភាពជាមួយនឹងភាពមានបាន ក្នុងនោះមានអ្នកមួយចំនួនភ្លេចគិតពីសុខភាព។ យើងមិនត្រូវភ្លេចខ្លួនយកចិត្តទុកដាក់តែការងារ រហូតគ្មានពេលសម្រាកនោះទេ។ ទាំងនេះជាការយល់ខុស ការពិតការចេញដើរកម្សាន្តតាមទីកន្លែងដែលពេញចិត្ត ដាក់អារម្មណ៍ទៅតាមបរិយាកាសពិតជាស្រស់ថ្លា ភ្លេចទុក្ខកង្វល់ ភ្លេចភាពនឿយហត់ វាធ្វើឱ្យអារម្មណ៍របស់យើងស្រស់ស្រាយ។ ដូចនេះយើងមិនគួរគិតរំលង ដើម្បីឱ្យជីវិតរស់មានគ្រប់រសជាតិ យើងត្រូវបង្កើតបរិយាកាសលំហែ ដោយការចេញក្រៅលំនៅដ្ឋាន ឬទីកន្លែងបំពេញការងារតាមរយៈដំណើរកម្សាន្តនានា។ ចំពោះអ្នកដែលមានគម្រោងដើរកម្សាន្តត្រូវចេះរៀបចំគម្រោងមួយចំនួន៖

1. បានរៀបចំផែនការគ្រួសារ ឬក្រុមការងារសម្រាប់ការជួបជុំសប្បាយៗ ដោយកំណត់ពេលឱ្យបានសមគួរ។

2. ជ្រើសរើសទីកន្លែងកម្សាន្ត រមណីយដ្ឋានដែលចូលចិត្ត តាមរដូវកាលនៃអាកាសធាតុ។

3. ត្រូវប្រាកដថាបានពិនិត្យមើលនូវទីតាំងដំណើរកម្សាន្តរួចរាល់ និងមានសុវត្ថិភាពនៅពេលធ្វើដំណើរ។

4. ត្រូវរៀបចំសម្ភារៈ ម្ហូប ចំណីអាហារ ជាលក្ខណៈគ្រួសារតាមការចូលចិត្ត (សុវត្ថិភាពចំណីអាហារ)។

5. ត្រូវប្រាកដថាមានកន្លែងសម្រាក ឬស្នាក់នៅត្រឹមត្រូវសមរម្យ។

6. ត្រូវដាក់ចិត្តសម្របខ្លួនទៅតាមបរិយាកាស និងទីកន្លែងក្នុងដំណើរកម្សាន្ត ទើបអារម្មណ៍ស្រស់ថ្លាល្អ។

យើងត្រូវយល់ថាការធ្វើដំណើរកម្សាន្ត គឺដើម្បីសុខភាព មិនមែនដើម្បីគេចពីអ្វីមួយ ឬគ្រាន់តែជាអារម្មណ៍នៃការធុញថប់។ ពេលខ្លះយើងមិនដឹងថាយើងកំពុងធ្វើដំណើរដើម្បីគេចពីភាពតានតឹងនោះទេ ប៉ុន្តែរាល់ពេលដែលមានវិស្សមកាលខ្លីមួយ យើងតែងតែទៅកាន់ទីកម្សាន្ត កន្លែងស្ងប់ស្ងាត់ដើម្បីរំសាយអារម្មណ៏ ឬទីក្រុង ដែលមិនធ្លាប់ស្គាល់ក៏អាចបម្រើឱ្យការសម្រាកខួរក្បាលបានដែរ ដែលជាការរត់គេចពីការងារ ភាពតានតឹង និងទំនួលខុសត្រូវ ដែលយើងមានបន្ទុកនៅផ្ទះ ឬកន្លែងការងារផ្សេងៗ។ ការធ្វើដំណើរគួរតែជាជម្រើសនៃរបៀបរស់នៅ ហើយវិធីដែលយើងធ្វើដំណើរគឺឆ្លុះបញ្ចាំងពីអាទិភាពជីវិតរបស់យើង ការលំហែមិនមាននិយមន័យអ្វីទាំងអស់ វាអាស្រ័យលើរបៀបដែលយើងមានអារម្មណ៍រីករាយ និងពេញចិត្ត នាំឱ្យស្រស់ស្រាយ។ ដូចគ្នានេះជម្រើសនៃការធ្វើដំណើររបស់យើងត្រូវបានជះឥទ្ធិពលយ៉ាងខ្លាំងដោយការជ្រើសរើសរបៀបរស់នៅយ៉ាងជាក់លាក់។ ប្រសិនបើយើងស្រលាញ់ធម្មជាតិ និងភាពឯកោនោះជាកន្លែងបិទផ្លូវនឹងទាក់ទាញយើងឱ្យស្ថិតនៅសភាពបែបហ្នឹង ហើយប្រសិនបើយើងចូលចិត្តពន្លឺ តន្ត្រី និងការរាំរែក នោះប្រហែលជាយើងជ្រើសរើសធ្វើដំណើរទៅកាន់កន្លែងផ្សេងៗ គេតែងនិយាយថា “យើងធ្វើដំណើរមិនអាចគេចពីជីវិតបានទេ ឯជីវិតក៏មិនគេចពីយើងបានដែរ” ហេតុនេះការធ្វើដំណើរកម្សាន្តគឺជាចំណីអារម្មណ៍យ៉ាងពិតប្រាកដ និងបានបំពេញនូវសេចក្តីសុខសម្រាប់ខ្លួនយើងផ្ទាល់ ក៏បានរំសាយទុក្ខកង្វល់បានច្រើនផងដែរ។

អត្ថបទដកស្រង់ និងបកប្រែចេញពីគេហទំព័រ៖

– https://www.dangerous-business.com/what-is-travel-and…/

– https://www.worldfootprints.com/…

A Dangerous Business Travel Blog (https://www.dangerous-business.com/what-is-travel-and…/)