ដំណើរទស្សនកិច្ចសិក្សា​លើក​ទី១០៦ ទៅ​កសិដ្ឋាន​ចិញ្ចឹម​សត្វ និង​ដំណាំ​ដាំ​ដុះ​តាម​បែប​ធម្មជាតិ​របស់​ប្រជា​កសិករ​គំរូ

កាលពីថ្ងៃទី១០ ខែមិថុនា ឆ្នាំ២០១៧ កន្លងទៅនេះ គណៈគ្រប់គ្រងសាលា​រៀន ​អន្តរទ្វីប អាមេរិកាំង ទាំងបីសាខា បានដឹកនាំសិស្សានុសិស្សថ្នាក់​ទី៨ ទៅទស្សនកិច្ចសិក្សាកសិដ្ឋានចិញ្ចឹមសត្វ និងដំណាំដាំដុះតាមបែបធម្មជាតិរបស់ប្រជាកសិករគំរូនៅភូមិចមពល ឃុំពពេល ស្រុកត្រាំកក់ ខេត្តតាកែវ។ ដំណើរទស្សនកិច្ចសិក្សានេះគឺមាន​សារៈសំខាន់​ក្នុង​វិស័យ​កសិកម្ម​កម្ពុជា ដែល​កំពុង​តែ​ប្រឈម​ខ្លាំង​លើ​​ការ​ប្រើប្រាស់​សារធាតុ​ពុល​ទៅ​លើ​បន្លែ ត្រី សាច់ ដោយ​មិន​បាន​គិត​ពី​ផល​ប៉ះពាល់​ដល់​សុខភាព​របស់​អ្នក​បរិភោគ។ សិស្សានុសិស្សទៅ​សិក្សា​ឈ្វេង​យល់​ពី​បច្ចេកទេស​ចិញ្ចឹម​សត្វ​ និង​ដាំ​បន្លែ​តាម​បែប​ធម្មជាតិ​ដោយ​គ្មាន​ប្រើ​ជីគីមី​និង​ថ្នាំ​ពុល​ពី​កសិករ​ឆ្នើម​នៅ​កសិដ្ឋាន​ចិញ្ចឹម​សត្វ និងចម្ការបន្លែនេះ។​ បន្ថែមពីនេះទៀតមានការចែករំលែកពីបទពិសោធចិញ្ចឹមសត្វ និងដាំបន្លែធម្មជាតិដល់សិស្សានុសិស្សពីម្ចាស់កសិដ្ឋាន ​ពី​បច្ចេកទេស និង​គំនិត​ច្នៃ​ប្រឌិត​ប្លែកៗ​ក្នុង​ដាំ​បន្លែ​និង​ចិញ្ចឹម​សត្វ​ដោយ​គ្មាន​ប្រើប្រាស់​សារធាតុ​គីមី ​តែ​ទទួល​ទិន្នផល​បាន​ខ្ពស់​ដែល​មាន​លក្ខណៈ​ខុស​ប្លែក​ឆ្ងាយ​ពី​ប្រជាកសិករ​ទូទៅ។ ​ ​ ទស្សនកិច្ចសិក្សាលើកនេះ ធ្វើឱ្យសិស្សទទួលបានចំណេះដឹងថ្មីៗលើផ្នែកកសិកម្ម​ ហើយ​ថែម​ទាំង​បាន​កម្សាន្ត​សប្បាយ​ជាមួយ​នឹង​មិត្តភក្តិ​ទៀត​ផង​ ដែល​ជា​ឱកាស​មួយ​ជួយ​ឱ្យ​ខួរ​ក្បាល​ស្រស់​ស្រាយ​ កាត់​បន្ថយ​ភាព​ស្មុគ​ស្មាញ​ពី​ការ​សិក្សា​ ជាពិសេស​ក៏បាន​ធ្វើ​ឱ្យ​ចំណង​មិត្ត​ភាព​របស់​ពួក​គេកាន់​តែ​រឹង​មាំថែម​ទៀត​ផង​ដែរ​ តាមរយៈការញ៉ាំអាហារជុំគ្នា ការពិភាក្សាក្រុម និងការ​លេង​ល្បែង​កម្សាន្ត​នានា។ បន្ទាប់មក​បាន​នាំ​សម្ភារ​សិក្សា​មួយ​ចំនួន​យក​ទៅ​ចែក​សិស្ស​សាលា​បឋម​សិក្សា​ចមពល​ប្រមាណ​ជាង​៣រយ​នាក់​ផង​ដែរ៕ ​

អត្ថបទដកស្រង់សារព័ត៌មាន ឌិ អ៊ីនធ័រខន​ រ៉ូស្ទ័រ