បច្ចេកវិទ្យាបៃតង

បច្ចេកវិទ្យាបៃតង (Green Technology) សំដៅដល់ប្រភេទបច្ចេកវិទ្យាដែលមានដំណើរការផលិតកម្ម ឬខ្សែច្រវាក់ផ្គត់ផ្គង់ផលិតផលរបស់ខ្លួន ដោយមិនផ្ដល់ផលប៉ះពាល់ ឬមានផលប៉ះពាល់តិចតួចបំផុត ចំពោះបរិស្ថាន។ លើសពីនេះទៀត បច្ចេកវិទ្យាបៃតងក៏សំដៅដល់ការប្រើប្រាស់បច្ចេកវិទ្យា និងវិទ្យា សាស្រ្ដនៅក្នុងផលិតកម្ម ដែលនឹងធ្វើឱ្យផលិតផលកាន់តែមានការគិតគូរពីបរិស្ថាន ដោយចូលរួមពង្រឹងដំណើរការអាជីវកម្ម កាត់បន្ថយសំណល់សំរាម និងផលប៉ះពាល់អវិជ្ជមានផ្សេងៗទៀតទៅលើបរិស្ថាន។

គោលបំណងសំខាន់របស់បច្ចេកវិទ្យាបៃតង គឺដើម្បីការពារបរិស្ថាន ហើយបច្ចេកវិទ្យាបៃតងក៏បានចូលរួមជួសជុលនូវការបំផ្លាញកន្លងមក ជួយដល់ការថែរក្សា និងការពារនូវធនធានធម្មជាតិរបស់ភពផែនដី។ បច្ចេកវិទ្យាបៃតងត្រូវប្រើប្រាស់ក្រោមទម្រង់ដូចជា៖

– បច្ចេកវិទ្យាកែច្នៃសំរាម កែច្នៃវត្ថុចាស់ៗមកប្រើឡើងវិញ

– បច្ចេកវិទ្យាសម្រាប់បន្សុទ្ធទឹកស្អាត បន្សុទ្ធខ្យល់

– ថាមពលកកើតឡើងវិញ ថាមពលបៃតង

– បច្ចេកវិទ្យាដែលចូលរួមថែរក្សា និងអភិរក្សនូវធនធានធម្មជាតិ

ខាងក្រោមនេះគឺជាបច្ចេកវិទ្យាបៃតងមួយចំនួនដែលកំពុងត្រូវបានប្រើប្រាស់ក្នុងពិភពលោក៖

រថយន្ដអគ្គិសនី : មានក្រុមហ៊ុនជាច្រើនបាននិងកំពុងអភិវឌ្ឍនូវរថយន្ដដែលប្រើប្រាស់ថាមពលអគ្គិសនី ដោយមិនបញ្ចេញឧស្ម័នបំពុលដល់បរិយាកាស។ ថ្មីៗនេះក៏ចាប់ផ្ដើមមានការបង្កើតរថយន្ដប្រើអ៊ីដ្រូសែន (Hydrogen) ដែលនឹងផ្ដល់ជម្រើសកាន់តែច្រើនជំនួសឱ្យការប្រើយានយន្ដធម្មតាដែលប្រើប្រាស់ប្រេង។

Sunlight Transport : បច្ចេកវិទ្យាបៃតងមួយនេះត្រូវបានអភិវឌ្ឍដោយក្រុមហ៊ុន Parans របស់ស៊ុយអែត។ បច្ចេកវិទ្យាមួយនេះអាចជួយយើងក្នុងការសន្សំសំចៃការប្រើប្រាស់ថាមពលសម្រាប់ភ្លើងបំភ្លឺនៅពេលថ្ងៃ ដោយវាអាចទាញយកពន្លឺព្រះអាទិត្យពីខាងក្រៅរួចបញ្ជូនតាមរយៈខ្សែកាបអុបទិក មកបំភ្លឺនៅផ្នែកខាងក្នុងអគារ។

Plastic Roads : ដើម្បីកាត់បន្ថយសំណល់ប្លាសិ្ទកដែលជាបញ្ហាប្រឈមចម្បងបំផុតមួយសម្រាប់បរិស្ថាន គេបានប្រើប្រាស់បច្ចេកវិទ្យាសម្រាប់កែច្នៃសំរាមប្លាសិ្ទក ដើម្បីយកទៅស្ថាបនាផ្លូវសម្រាប់ធ្វើដំណើរដោយមាន២ជម្រើស គឺអាចប្រើប្រាស់ប្លាស្ទិកសុទ្ធ ឬលាយជាមួយកៅស៊ូក្រាលថ្នល់។ បច្ចេកវិទ្យានេះត្រូវបានប្រើប្រាស់នៅក្នុងប្រទេសហូឡង់។

Solar Flower : ផ្កា Solar គឺជាបច្ចេកវិទ្យាទាញយកថាមពលអគ្គិសនីពីពន្លឺព្រះអាទិត្យរបស់ក្រុមហ៊ុន Smart Flower នៅសហរដ្ឋអាមេរិកដែលជាបន្ទះ Solar មានរាងដូចផ្កាហើយបំពាក់ដោយ tracker ដើរតាមដំណើររបស់ព្រះអាទិត្យ។

Milk Textiles : គេបានប្រើប្រាស់បច្ចេកវិទ្យានេះដើម្បីផលិតសាច់ក្រណាត់ដែលមានភាពទន់រលោង ដោយប្រើសរសៃអំបោះចម្រាញ់ចេញពីទឹកដោះគោ ហើយមិនមានប្រើសារធាតុគីមីទេ។ បច្ចេកវិទ្យាមួយនេះត្រូវច្នៃបង្កើត និងប្រើប្រាស់ដោយក្រុមហ៊ុន Qmilk នៅប្រទេសអាល្លឺម៉ង់។

Plant-based Packaging : ការប្រើប្រាស់បច្ចេកវិទ្យាក្នុងការផលិតប្លាស្ទិក តាមរយៈការកែច្នៃឡើងវិញ ១០០% និងអាចរលាយនៅក្នុងធម្មជាតិ ហើយមិនបង្កផលប៉ះពាល់ដល់បរិស្ថាន។ បច្ចេកវិទ្យានេះត្រូវបានបង្កើត និងប្រើប្រាស់ដោយក្រុមហ៊ុន Avantium ក្នុងប្រទេសហូឡង់។

អត្ថបទដកស្រង់ចេញពីគេហទំព័រ៖