បំណិនជីវិត ភ្លៅមាន់បំពង

កាលពីថ្ងៃទី២៩ ខែមិថុនា ឆ្នាំ២០១៧ កន្លងទៅនេះ ​លោកគ្រូ​ ញាណ​ សុវណ្ណតារាបានដឹកនាំសិស្សានុសិស្សថ្នាក់ទី៥ “ក” វេនព្រឹក និងវេនរសៀលរៀនធ្វើភ្លៅមាន់​បំពងនៅអគារ ងិន ហួយ នៃសាលារៀន អន្តរទ្វីប អាមេរិកាំង សាខាម៉ៅសេទុង។ លោកគ្រូបានបង្ហាញពីរបៀបធ្វើភ្លៅមាន់​បំពងដោយយក​ភ្លៅមាន់​ដាក់​ស្ងោរ​ឱ្យឆ្អិន​ផុយបន្តិច​ ​ចោះពង​មាន់​លាយជាមួយ​ទឹកដោះគោ​ឱ្យសព្វល្អ​ ចាក់ម្ស៉ៅ​បំពង​ អំបិល​ ម្ស៉ៅ​ស្រួយ​ និង​ម្ស៉ៅស៊ុបខ្នរ​លាយចូល​គ្នាឱ្យ​សព្វ​។​ ដាក់ប្រេង​ឆាក្នុង​ខ្ទះកម្ដៅ​ឱ្យពុះស្រួល​ រួច​យកភ្លៅមាន់​ច្របល់នឹង​ពងមាន់​ដែល​យើង​លាយជាមួយ​ទឹកដោះ​គោ ​​ដើម្បី​ឱ្យ​មានសំណើម​ បន្ទាប់​មក​យក​ទៅប្រឡាក់​ជាមួយម្ស៉ៅ​បំពង​ដែលយើងបា​នលា​យទុក​ រួច​ហើយដាក់​ចូល​ក្នុង​ខ្ទះខ្លាញ់​។​ ក្រោយ​ពេលបង់​ភ្លៅមាន់ចូល​ក្នុងខ្លាញ់រួច​ យើង​រង់ចាំដល់​ភ្លៅ​មាន់ឡើង​ពណ៌ក្រហម​ល្មម​ ស្រង់​ចេញពីខ្ទះ​ជាការ​ស្រេច​។​​ បន្ទាប់មកទៀត សិស្សានុសិស្ស​បានចូលរួមធ្វើភ្លៅមាន់​បំពងហើយព្រមទាំងបានភ្លក្សរសជាតិអាហារប្រកប​ដោយភាពសប្បាយរីករាយ។ លោកគ្រូបានចែករំលែកនូវវិធីសាស្រ្តក្នុងការធ្វើភ្លៅមាន់​បំពង ដើម្បីធ្វើឱ្យអាហារមានរសជាតិឆ្ងាញ់ពិសាទៅតាមចំណង់ចំណូលចិត្តរបស់​សិស្សានុសិស្ស និងគ្រួសារ។ បន្ទាប់ពីភ្លៅមាន់​បំពងត្រូវបានធ្វើរួចរាល់ហើយ លោកគ្រូ និងអ្នកគ្រូបានបង្ហាញពីរបៀបរៀបចំ​អាហារដាក់​ចានឱ្យបានត្រឹមត្រូវ មានបរិមាណសមរម្យ និងមានសោភ័ណភាព ព្រមទាំងញុំាអាហារ​ដែលបានធ្វើនោះទាំងអស់គ្នាដោយភាពស្និទ្ធស្នាលជាភាតរភាពក្រៃលែង។ ប្រសិនបើ​ចង់​ឱ្យ​ភ្លៅមាន់​បំពង​កាន់​តែមា​ន​រសជាតិ​ឈ្ងុយឆ្ងាញ់​ យើង​អាច​ដាក់​សាឡាដ​ទ្រាប់​ពីក្រោម​ ឬ​អាច​បរិភោគ​ជាមួយដំ​ឡូងបារាំង​បំពង​ជាដើម​។ លើសពីនេះទៅទៀតក៏អាចយកចំណេះដឹងទាំងនេះទៅប្រើប្រាស់ក្នុងជីវភាពរស់នៅប្រចាំថ្ងៃ។ អត្ថបទ និងរូបភាពដកស្រង់សារព័ត៌មាន ឌិ អ៊ីនធ័រខន​ រ៉ូស្ទ័រ