ពិធីជួបសំណេះសំណាល និងផ្តាំផ្ញើដល់ក្រុមកីឡា

កាលពីថ្ងៃទី២៦ ខែកញ្ញា ឆ្នាំ២០១៧ កន្លងទៅនេះ គណៈគ្រប់គ្រងសាលារៀន អន្តរទ្វីប អាមេរិកាំង  បានជួបសំណេះសំណាល​ និង​ផ្ដាំ​ផ្ញើ​ដល់​សិស្សានុសិស្ស​ដែល​ជា​កីឡាករ កីឡាការិនី​តំណាង​មណ្ឌល​រាជធានី​ភ្នំពេញ។ ​ ពិធី​សំណេះសំណាល​នេះ​ធ្វើ​ឡើង​មុន​ការ​ប្រកួត​កីឡា​សិស្ស​ជ្រើសរើស​ជើង​ឯក​ទូទាំង​ប្រទេស​ប្រចាំឆ្នាំ២០១៦-២០១៧ មកដល់ ដែលការប្រកួតនេះធ្វើឡើងនៅឯទីរួម​ខេត្ត​កំពង់ចាម ​ចាប់​ពី​ថ្ងៃ​ទី​២៦កញ្ញា​ រហូត​ដល់​ថ្ងៃទី​៥តុលា ខា​​ង​មុខនេះ។ លោក ជាង ប៊ុនលី ប្រធានចាងហ្វាងមធ្យមសិក្សាទុតិយភូមិនៃសាលារៀន អន្តរទ្វីប អាមេរិកាំង បានប្រាប់​កីឡាករ​ កីឡាការិនី​របស់​ខ្លួន​ឱ្យ​ចេះ​សហការគ្នា សាមគ្គី​ជាមួយ​នឹង​កីឡាករ កីឡាការិនីជា​សិស្ស​មក​ពី​សាលា​ដទៃទៀត ​ដែល​តំណាងឱ្យ​មណ្ឌល​រាជធានី​ភ្នំពេញ​ដូច​គ្នា។ លើស​ពី​នេះ​ត្រូវ​ចេះថែ​រក្សា​សុខភាព និង​ប្រកាន់​យក​នូវ​ឥរិយាបថថ្លៃថ្នូរ ស្ដាប់ការណែនាំរបស់គ្រូដឹកនាំ ស្ដាប់អាជ្ញា​កណ្ដាល ​គោរពវិន័យ ​បទបញ្ញត្តិ​ទូទៅ ខិត​ខំប្រឹង​ប្រែង​ឱ្យអស់ពី​សមត្ថភាព ធ្វើយ៉ាងណានាំយកមេដាយជូនមណ្ឌល​រាជធានី​ភ្នំពេញ​ឱ្យ​បាន​។ ​ កីឡាករ កីឡាការិនីដែលជាសិស្សានុសិស្សសាលារៀន អន្តរទ្វីប អាមេរិកាំង ​ដែលតំណាង​មណ្ឌល​រាជធានី​ភ្នំពេញ​មាន​ចំនួន​១៦​នាក់ ​ដែល​នឹង​ចូល​រួម​ប្រកួត​ពីរ​វិញ្ញាសា​កីឡាគឺ ​វាយកូនឃ្លីលើតុ និងបាល់បោះនារី នៅក្នុងចំណោមវិញ្ញាសា​កីឡា​ច្រើន​ប្រភេទ​ទៀត​​ដែល​រៀបចំ​ឡើង​ដោយ​ក្រសួងអប់រំ យុវជន និងកីឡា៕