ស្វែងយល់ពីរបៀបឆបោកតាមប្រព័ន្ធបច្ចេកវិទ្យា

ជារៀងរាល់ថ្ងៃការប្រើប្រាស់ប្រព័ន្ធបច្ចេកវិទ្យាជាមួយអ៊ីនធឺណែតក្នុងប្រទេសកម្ពុជា មានការកើនឡើងបន្តបន្ទាប់ និងមានមនុស្សជាច្រើនបានទាញយកផលប្រយោជន៍ពីបច្ចេកវិទ្យានេះ ហើយប្រជាជនពលរដ្ឋមួយចំនួននៅមានកម្រិតទៅលើចំណេះដឹងស្តីពីហានិភ័យប្រើប្រាស់ប្រព័ន្ធបច្ចេកវិទ្យា ដោយមានជនខិលខូចបានឆ្លៀតឱកាសកេញចំណេញ ឆបោកប្រាក់ ការគំរាមកំហែង ការលួចទិន្នន័យ និងតាមរូបភាពល្មើសច្បាប់ផ្សេងៗពីអ្នកប្រើប្រាស់។ ទន្ទឹមនឹងការវិវឌ្ឍនៃបច្ចេកវិទ្យា យើងសង្កេតឃើញមានបទល្មើសដែលប្រើប្រាស់ប្រព័ន្ធបច្ចេកវិទ្យាជាមធ្យោបាយ ក៏កំពុងកើតមានជាច្រើនករណី និងមានបងប្អូនប្រជាពលរដ្ឋក្លាយជាជនរងគ្រោះជាបន្តបន្ទាប់ផងដែរ។ ដូចនេះខ្ញុំសូមលើកយកចំណុចខ្លះៗដែលមានភាពងាយរងគ្រោះក្នុងការឆបោកតាមប្រព័ន្ធបច្ចេកវិទ្យាមានដូចខាងក្រោម៖

១. ប្រាប់ជនរងគ្រោះថាឈ្នះរង្វាន់ធំពីកម្មវិធីឆ្នោតផ្សេងៗ ដែលមានទំហំទឹកប្រាក់រាប់ម៉ឺនដុល្លារអាមេរិក និងតម្រូវប្រាក់កក់ដើម្បីរត់ការឯកសារ ឬផ្ទេរប្រាក់។

២. កង្វះការយល់ដឹងអំពីហានិភ័យនៃការប្រើប្រាស់បច្ចេកវិទ្យា។

៣. ប្រាប់ជនរងគ្រោះថា ពួកគេបានគ្រប់គ្រងកុំព្យូទ័រ ឬទូរស័ព្ទដៃ និងបានថតសកម្មភាពអាក្រាតកាយជនរងគ្រោះ និងតម្រូវឱ្យជនរងគ្រោះបង់ប្រាក់ជាថ្នូរនឹងការលុបរូបភាព ឬវីដេអូទាំងនោះ។

៤. ភាពអំណោយផលនៃប្រតិបត្តិការផ្ទេរប្រាក់ (Crypto Currency / Digital Payment / Payment System / Bank Transfer)។

៥. ឧក្រិដ្ឋជនបច្ចេកវិទ្យា ប្រើប្រាស់វិធីសាស្ត្រ និងបច្ចេកទេសខ្ពស់ក្នុងការប្រព្រឹត្តិបទល្មើស។

៦. ឧក្រិដ្ឋជនចាប់ផ្តើមប្រព្រឹត្តិបទល្មើស ស្ថិតក្រោមរចនាសម្ព័ន្ធចាត់តាំង។

៧. ការវាយប្រហារតាមអ៊ិនធឺណែតបែបវិស្វកម្មសង្គម (social engineering) និងការបោកបញ្ជោត (phishing) បើចង់បានទិន្នន័យវិញត្រូវបង់លុយ។

៨. ប្រាប់ជនរងគ្រោះថានឹងទទួលបានប្រាក់ចំណេញទ្វេដង (Money-Flipping) ប្រសិនបើជនរងគ្រោះបណ្តាក់ទុនជាមួយខ្លួន។

៩. ដាក់លក់ ឬដេញថ្លៃទំនិញអនឡាញដែលមានតម្លៃថោកជាងតម្លៃទីផ្សារ និងតម្រូវឱ្យជនរងគ្រោះទូទាត់ប្រាក់មុនបញ្ជូនទំនិញ។

អត្ថបទសង្ខេបខាងលើនេះ គឺដើម្បីចូលរួមផ្សព្វផ្សាយទៅដល់អ្នកប្រើប្រើប្រាស់ប្រព័ន្ធបច្ចេកវិទ្យាឱ្យមានការប្រុងប្រយ័ត្នបន្ថែមទៀតឱ្យបានខ្ពស់ និងដើម្បីជួយការពារអ្នកប្រើប្រាស់បច្ចេកវិទ្យា ព្រមទាំងកាត់បន្ថយហានិភ័យលើបណ្តាញអ៊ីនធឺណិត និងជួយកាត់បន្ថយភាពងាយរងគ្រោះដោយធ្វើការអាន ស្តាប់ ទស្សនាវីដេអូ និងសិក្សាស្វែងយល់បន្តទៀត ពីព្រោះរបៀបឆបោកទារប្រាក់តាមប្រព័ន្ធ បច្ចេកវិទ្យានេះ វាមានរូបភាពផ្សេងៗជាច្រើនទៀតចំពោះអ្នកប្រើប្រាស់ ។

អត្ថបទដកស្រង់ចេញពីគេហទំព័រ៖ https://kohsantepheapdaily.com.kh/article/1333288.html