សហគមន៍នៃសាលារៀន អន្តរទ្វីប អាមេរិកាំងយើង

បំណងនៃបេសកកម្មអប់រំរបស់យើង គឺដើម្បីជួយដល់កូនៗ និងប្រជាពលរដ្ឋទូទៅឱ្យមានវឌ្ឍនភាពនៅក្នុងប្រទេស។ សាលារៀន អន្តរទ្វីប អាមេរិកាំងរបស់យើងដែលបច្ចុប្បន្នមានប្រាំមួយសាខានៅក្រុងភ្នំពេញ គឺជាសហគមន៍អប់រំមួយដែលធ្វើការជាមួយគ្នាដោយភាពស្អិតរមួត ប្រៀបដូចជាមនុស្សនៃគ្រួសារតែមួយ។ ទាំងសិស្សានុសិស្ស ឪពុកម្តាយ អ្នកអាណាព្យាបាល និងលោកគ្រូ អ្នកគ្រូរបស់យើងមានអារម្មណ៍ទទួលការស្វាគមន៍ និងចូលរួមសហការគ្នាប្រកបដោយភាតរភាព។ ហើយយើងចង់ឱ្យសាលារៀនយើងឱ្យក្លាយជាសមាជិកអភិវឌ្ឍដ៏សកម្មនៅក្នុងសង្កាត់ ខណ្ឌ ក្រុង និងប្រទេសដើម្បីឱ្យមានការរីកចម្រើននៅតាមសហគមន៍នីមួយៗ។

សហគមន៍នៃសាលារៀនយើង

នៅពេលលោកអ្នក និងកូនៗរបស់លោកអ្នកចូលរួមក្នុងសហគមន៍អប់រំនៃសាលារៀន អន្តរទ្វីប អាមេរិកាំងរបស់យើង លោកអ្នក និងកូនៗនឹងត្រូវបានស្វាគមន៍ក្នុងសហគមន៍យ៉ាងកក់ក្តៅ។ លោកគ្រូ អ្នកគ្រូ បុគ្គលិកគ្រប់ជាន់ថ្នាក់ ត្រៀមខ្លួនជានិច្ចក្នុងការជួយលោកអ្នក និងពួកគាត់ក្នុងទិដ្ឋភាពនៃជីវិតអប់រំនៅសាលារៀន អន្តរទ្វីបយើង។ សាលារៀនយើង គឺជាមជ្ឈមណ្ឌលអប់រំសម្រាប់សហគមន៍របស់ពួកគាត់ ហើយមានព្រឹត្តិការណ៍ និងសកម្មភាពដ៏មានតម្លៃជាច្រើនសម្រាប់ពួកគាត់ដូចជាកម្មវិធីអប់រំពិសេស កម្មវិធីប្រកួតប្រជែងផ្សេងៗ កម្មវិធីជំនាញថ្ងៃសៅរ៍ កម្មវិធីទស្សនកិច្ច កម្មវិធីវប្បធម៌ និងកម្មវិធីសង្គមជាដើម។

ការគាំទ្រសហគមន៍នៃមូលដ្ឋានរបស់យើង

ក្រៅតែអំពីការផ្តល់នូវការអប់រំប្រកបដោយគុណភាព យើងក៏មានកម្មវិធីវិនិយោគ ឬជួយសហគមន៍របស់យើង ផងដែរ ដែលជាគំនិតផ្តួចផ្តើមដើម្បីសកម្មភាពសប្បុរសធម៌។ យើងគិតថាសាលារៀនគឺជាផ្នែកសំខាន់មួយនៃសហគមន៍។ ហើយសាខានៃសាលារៀនយើងទាំងអស់ តែងតែត្រូវបានលើកទឹកចិត្តឱ្យក្លាយជាសមាជិកសកម្មក្នុងការជួយសហគមន៍នៃមូលដ្ឋានរបស់ពួកគាត់នីមួយៗ។ សិស្សានុសិស្ស អ្នកអាណាព្យាបាល បុគ្គលិក និងលោកគ្រូ អ្នកគ្រូរបស់យើងតែងតែបរិច្ចាគពេលវេលាដ៏មានតម្លៃ សម្ភារ និងធនធានរបស់ពួកគាត់ដើម្បីគាំទ្រគម្រោង សប្បុរសធម៌ និងសហគមន៍របស់យើង។ ទាំងនេះជាទង្វើរដ៏ថ្លៃថ្លា និងជាគំរូសម្រាប់សង្គមជាតិទាំងមូល ហើយក៏ជាការបង្ហាញពីទំនាក់ទំនងយ៉ាងជិតស្និទ្ធរវាងប្រជាពលរដ្ឋនៃសហគមន៍ និងសាខានៃសាលារៀនយើងផងដែរ។

គម្រោងសហគមន៍របស់យើង

សាលាបានបង្កើតកម្មវិធី សប្បុរសធម៌ដើម្បីសហគមន៍ មួយនៅខែកញ្ញា ឆ្នាំ២០១៨ ដោយធ្វើការរៃអង្គាសតាមឆន្ទៈ និងលទ្ធភាពនូវថវិកា សម្ភារសិក្សា តុ កៅអីគ្រូ ធុងសម្រាម បង់អង្គុយ និងដើមផ្កា ព្រមទាំងដឹកនាំសិស្សានុសិស្ស លោកគ្រូ អ្នកគ្រូ បុគ្គលិកដែលស្ម័គ្រចិត្តទៅធ្វើធ្វើសួនច្បារ លាបថ្នាំក្លោងទ្វារ បង្អួច និងទ្វារនៅសាលាទួលសូភីដែលជាសហគមន៍ក្រីក្រមួយនៅខេត្តកណ្តាល។ គោលបំណងនៃកម្មវិធីសប្បុរសធម៌នេះគឺដើម្បី បណ្តុះវប្បធម៌ និងរបៀបធ្វើការនៅសហគមន៍ជាក់ស្តែងដល់កូនៗ ព្រមទាំងចង់ឱ្យពួកគាត់មានបទពិសោធន៍លើការងារផ្នែកនេះ ដែលជាតម្រូវការសម្រាប់លក្ខខណ្ឌមួយនៃអាហាររូបករណ៍សិក្សានៅក្រៅប្រទេស។ ម្យ៉ាងទៀត ជាសកម្មភាពប្រកបដោយអត្ថន័យសម្រាប់សង្គម និងសម្រាប់ពិភពលោកផងដែរ។
នៅតាមសាខានីមួយៗ សាលារៀនយើងបានបង្កើតហិបសប្បុរសធម៌ សម្រាប់លើកទឹកចិត្ត និងគាំទ្រដល់សិស្សានុសិស្សក្នុងការបរិច្ចាគនូវថវិកា ឬសម្ភារដែលគ្រួសារ ឬពួកគាត់ឈប់ប្រើដែលមានដូចជាស្បែកជើង សៀវភៅ សម្លៀកបំពាក់ កង់ ថវិកា ឬសម្ភារផ្សេងៗទៀតទៅតាមលទ្ធភាពរបស់ពួកគាត់នីមួយៗដើម្បីសាលាយកទៅជួយដល់សហគន៍នៃប្រជាពលរដ្ឋក្រីក្រនៅក្នុងប្រទេស។
រៀងរាល់កម្មវិធីតាំងពិព័រណ៍ កម្មវិធីវប្បធម៌ ឬកម្មវិធីផ្សេងៗ សាលាតែងតែបណ្តុះគំនិតសប្បុរសធម៌ដល់កូនៗដោយរៀបចំឱ្យពួកគាត់លក់ចំណីអាហារ ភេសជ្ជ ឬសម្ភារផ្សេងៗដើម្បីយកប្រាក់ចំណេញជួយដល់សហគមន៍ក្រីក្រ។ សកម្មភាពនេះ សាលាមានបំណងចង់បណ្តុះនូវគំនិតមនុស្សធម៌ និងការចេះធ្វើ និងគ្រប់គ្រងអាជីវកម្ម(ខ្នាតតូច)និងរបៀបធ្វើការងារជាក្រុមផងដែរ។
ជាមួយដំណើរទស្សនកិច្ចប្រចាំឆ្នាំសិក្សានៃសិស្សានុសិស្ស សាលារៀន អន្តរទ្វីប អាមេរិកាំងតែងតែផ្សារភ្ជាប់ជានិច្ចនូវសកម្មភាពសប្បុរសធម៌នៅសហគមន៍ ដោយបំផុសដល់កូនៗដែលត្រូវធ្វើទស្សនកិច្ចសិក្សាឱ្យរៀបចំតាមឆន្ទៈ និងលទ្ធភាពរបស់ពួកគាត់នីមួយៗនូវសម្ភារសិក្សា សម្លៀកបំពាក់ នំ ឬអំណោយផ្សេងៗដើម្បីផ្តល់ជូនដល់សិស្សានុសិស្សនៃសាលារៀននៅសហគន៍ក្រីក្រនៅតាមបណ្តោយផ្លូវនៃដំណើរទស្សនកិច្ចរបស់យើង។ សកម្មភាពនេះផងដែរ ក្រៅអំពីការផ្សារភ្ជាប់នូវការយល់ដឹងជាក់ស្តែងនៅតំបន់ទស្សនកិច្ច កូនៗត្រូវបានបណ្តុះគំនិតសប្បុរសធម៌ដែលជាសកម្មភាពដ៏ថ្លៃថ្លាសម្រាប់សង្គម និងពិភពលោក។