ទំព័រដើម / ពិធីបិទការប្រកួតកីឡាក្របខណ្ឌសិស្សជ្រើសរើសជើងឯកពានរង្វាន់
កាលពីថ្ងៃទី០៦ ខែសីហា ឆ្នាំ២០២៣ កន្លងទៅនេះ គណៈកម្មការកីឡានៃមជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង បានរៀបចំពិធីបិទការប្រកួតកីឡាក្របខណ្ឌសិស្សជ្រើសរើសជើងឯកពានរង្វាន់ ម៉េងលី ជេ. គួច ជំនាន់ទី១៦ ប្រចាំឆ្នាំ២០២៣ នៃមជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង ដែលមានការរួមពីសំណាក់ គណៈគ្រប់គ្រង ចាងហ្វាង លោកគ្រូ អ្នកគ្រូ អ្នកអាណាព្យាបាលសិស្ស និងសិស្សានុសិស្សដែលជាកីឡាករ និងកីឡាការិនីយ៉ាងច្រើនកុះករ នៅទីលានបាល់ទាត់ នៃមជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង សាខាចាក់អង្រែ ក្រោមអធិបតីភាព លោកស្រី រស់ យ៉ាណា ប្រធាន នៃសាលារៀន អន្តរទ្វីប អាមេរិកាំង។
ក្រុមកីឡាករ កីឡាការិនីវ័យក្មេងដែលជាសិស្សានុសិស្ស បានធ្វើការប្រកួតប្រជែងគ្នាយ៉ាងស្វិតស្វាញអស់រយៈពេលជាច្រើនសប្តាហ៍កន្លងមក លើវិញ្ញាសាដែលខ្លួនបានហ្វឹកហាត់ផ្សេងៗពីគ្នា ហើយកីឡាករ និងកីឡាការិនី ដែលមានសមត្ថភាពដណ្តើមបានជ័យលាភីត្រូវទទួលពានរង្វាន់ មេដាយមាស មេដាយប្រាក់ មេដាយសំរឹទ្ធិ និងរង្វាន់លើកទឹកចិត្តជាកិត្តិយសដល់ក្រុមកីឡាករជ័យលាភីផងដែរ។
ថ្លែងក្នុងពិធីបិទការប្រកួតកីឡាសិស្សនោះផងដែរ លោកស្រី រស់ យ៉ាណា ប្រធាន នៃសាលារៀន អន្តរទ្វីប អាមេរិកាំង បានសម្តែងនូវការកោតសរសើរ និងមានមោទកភាពយ៉ាងខ្លាំងបំផុតចំពោះក្រុមកីឡាករ កីឡាការិនីទាំងអស់ ដែលបានធ្វើការប្រកួតប្រជែងយ៉ាងស្វិតស្វាញជាច្រើនសប្តាហ៍កន្លងមក រហូតទទួលបានលទ្ធផលដ៏ប្រសើរប្រកបដោយភាពស្និទ្ធស្នាល សាមគ្គីភាព សេចក្តីថ្លៃថ្នូរ និងភាតរភាពក្នុងពេលប្រកួតទាំងនៅក្នុងសាលា ការប្រកួតថ្នាក់ជាតិ និងការប្រកួតនានាក្នុងពេលកន្លងមក ស្របតាមទិសដៅយុទ្ធសាស្ត្ររបស់មជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង ដែលបង្កើតឱ្យមានកម្មវិធីកីឡាក្រៅម៉ោងសិក្សានេះឡើង ដើម្បីឱ្យសិស្សានុសិស្សទាំងអស់មានសុខភាពល្អ កាយសម្បទារឹងមាំ ប្រាជ្ញាឈ្លាសវៃ មានភាពរហ័រហួន រឹតចំណងមិត្ដភាព ភាតរភាព ចៀសផុតពីគ្រឿងញៀន និងល្បែងស៊ីសង ជាពិសេសគឺបណ្តុះទឹកចិត្តយុវជនឱ្យចូលរួមសកម្មភាពផ្សេងៗក្នុងសង្គមឱ្យបានច្រើនតាមដែលអាចធ្វើទៅបាន។ នៅក្នុងពិធីបិទការប្រកួតនេះដែរ ក៏មានការសម្តែងទេពកោសល្យពីសំណាក់សិស្សានុសិស្សនៃសាលារៀន អន្តរទ្វីប អាមេរិកាំង ដែលញុំាងឱ្យកម្មវិធីកាន់តែអធិកអធម និងពោរពេញដោយភាពសប្បាយរីករាយ។ ជាចុងក្រោយនៃកម្មវិធី គឺការប្រគល់មេដាយ និងពានរង្វាន់ដល់កីឡាករ កីឡាការិនីជ័យលាភីពីសំណាក់គណៈគ្រប់គ្រងសាលា ព្រមទាំងមានការថតរូបអនុស្សាវរីយ៍យ៉ាងសប្បាយរីករាយផងដែរ។
សកម្មភាពក្នុងពិធីបិទការប្រកួតកីឡាក្របខណ្ឌសិស្សជ្រើសរើសជើងឯកពានរង្វាន់
ខ្មែរ
អង់គ្លេស