លោកគ្រូ ផល សុភក្រ្ត

ទំព័រដើម / លោកគ្រូ ផល សុភក្រ្ត

លោក ផល សុភក្រ្ត

គ្រូបង្រៀនគណិតវិទ្យា

ជាគ្រូបង្រៀន​ឯកទេស​គណិតវិទ្យាមួយរូប ខ្ញុំតែងតែលះបង់ទាំងកម្លាំងកាយចិត្ត និងពេលវេលា ដើម្បីបណ្ដុះបណ្ដាលសិស្សានុសិស្សឱ្យទទួលបានចំនេះដឹងពិតប្រាកដ។ ឆ្នាំសិក្សា​​២០0៦-២០១០ ខ្ញុំបានបញ្ចប់​ការសិក្សា​ថ្នាក់​បរិញ្ញាបត្រ​ពីសា​កល​វិទ្យាល័យ​ភូមិន្ទ​ភ្នំពេញ ​និងបានប្រឡងចូលក្របខណ្ឌរដ្ឋ ជាគ្រូកម្រិតឧត្តមសិក្សានិងទទួលបានការសិក្សា​​វគ្គ​បណ្តុះបណ្តា គរុកោសល្យជំនាន់ទី១៦ ​រយៈពេលមួយឆ្នាំពេញដោយ​ជោគជ័យ ​នៅវិទ្យាស្ថាន​ជាតិ​អប់រំ​ ​រាជធានី​ភ្នំពេញ​។ ខ្ញុំ​បាន​ប្រែប្រួល​ខ្លួន​ពី​និស្សិត​និងគរុ​និស្សិត​ម្នាក់​ទៅជា​អ្នក​ផ្តល់​ចំណេះដឹង​ព្រមទាំងផ្តល់ការអប់រំទាំងសីធម៍ និង វិន័យដល់​សិស្ស​វិញ​។ ដោយហេតុតែ​វា​ជា​ឧបនិស្ស័យ​ ស្រឡាញ់​ការអប់រំ​តាំងតែពី​តូច​មក​ និង​តែង​ស្រម៉ៃថា​នឹង​ក្លាយជា​គ្រូ​បង្រៀនដ៏ល្អម្នាក់​។

នៅដើមខែតុលា​ឆ្នាំ២០១១​ ខ្ញុំ​បាន​ចូល​បម្រើការ​ងារ​ជាម​ន្ត្រី​រាជការ​​ក្របខណ្ឌ​រដ្ឋ​នៃក្រ​សួង​អប់រំ​ យុវជន​ និងកីឡា ហើយបន្តរហូតមកដល់បច្ចុប្បន្នជាគ្រូបង្រៀនមុខវិជ្ជាគណិតវិទ្យានៅ​វិទ្យាល័យហ៊ុនសែនសេរីភាព ខេត្តកណ្តាល​ ​។ ក្នុងនាមជាបុគ្កលិកអប់រំម្នាក់ខ្ញុំយល់ឃើញថា​ ប្រទេសជាតិ​មួយ​រីកចម្រើន​ គឺ​ដោយសារ​សម្បូរទៅដោយ​ធនធានមនុស្ស​ប្រកប​ដោយសក្តានុពល។​ ដូចនេះ​ ​ការ​រួមចំណែក​របស់ខ្ញុំ​គឺពិតជា​ពោរពេញ​ដោយ​មោទនភាព​ណាស់​។

ជាមួយគ្នានោះផងដែរការ​អភិវឌ្ឍ​ខ្លួន​មិនត្រឹមតែនៅសាលារដ្ឋមួយប៉ុណ្ណោះទេ គឺនៅថ្ងៃទី៣​ ខែសីហា​ឆ្នាំ២០១៥ ជាថ្ងៃដំបូងដែលខ្ញុំ​បានឈានជើងប្រឡូកចូល​​បម្រើការងារនៅស្ថាប័នគ្រឹះស្ថាន​អប់រំ​ឯកជនមួយនៅកម្ពុជា​ដែល​ផ្តោត​លើ​គុណភាព​ វិន័យ​ និង​សេវាកម្ម​ល្អ​។ សាលារៀន​ អន្តរទ្វីប ​អាមេរិកាំង​ ក៏បាន​ក្លាយជា​ទីកន្លែងកក់ក្តៅ​ទី២របស់​ខ្ញុំ។ ​​ខ្ញុំបាន​ចាប់ផ្តើម​បង្រៀន​គណិតវិទ្យា​សម្រាប់​កម្រិត​ថ្នាក់​ទី១០ និង១១។ ផងដែរខ្ញុំ​បាន​រៀនសូត្រ​និង​ដក​បទ​ពិ​សោ​ធថ្មី​ៗច្រើន​រាប់មិនអស់​ ហើយនៅ​ទីនេះ​មិនមែន​បង្រៀន​សិស្ស​តែ​ចំណេះដឹងឯកទេស​ប៉ុណ្ណោះទេ​ ថែមទាំង​បង្កើត​កម្មវិធី​ជា​​ច្រើន​ទៀត​ ដើម្បី​ឱ្យ​សិស្ស​មានឱកាស​ស្វែងយល់​ពីសង្គម​ខាងក្រៅ​ឱ្យ​បាន​ច្រើន​ទាំង​សិក្ខាសាលា​ ដំណើរ​ទស្សនកិច្ច​សិក្សា​ក្នុងនិងក្រៅប្រទេស និងការប្រឡងប្រកួតប្រជែង​នានា។

ទោះបី​ទំហំ​ការងារ​កាន់តែ​រីក​ធំ​ តែខ្លួន​ខ្ញុំ​ពេញចិត្ត​នឹង​រៀន​ពី​អ្វី​ដែល​ថ្មី​ៗ រឿង​ដែល​គួរ​ឱ្យ​កត់សម្គាល់​ទៅទៀត​ឃើញថា​ ការ​បំពេញការងារ​ក្នុង​ពេល​ដ៏​ខ្លី​សោះ​ តែខ្លួន​ខ្ញុំ​ពិតជា​រៀន​បាន​ច្រើន​​ រឹតតែ​ធ្វើ​ឱ្យ​ខ្លួនឯង​មាន​ទំនួល​ខុសត្រូវ​ខ្ពស់​លើ​មនសិការ​វិជ្ជាជីវៈ​ខ្លួន​ថែមទៀត​។​

ខ្ញុំ​ប្តេជ្ញា​ថា​នឹង​ខិតខំ​បំពេញ​តួនាទី​ខ្លួន​ឱ្យ​រឹតតែ​ល្អ​ទៅទៀត​ ជាពិសេស​ការសិក្សា​ស្រាវ​ជ្រាវ​អ្វី​ៗដែល​ថ្មី​ ដើម្បី​យក​មក​បង្ហាត់​សិស្ស​ឱ្យ​រឹតតែ​រស់រវើក​ ធានា​ឱ្យ​បាន​នូវ​ដំណើរការ​រៀន​ និង​បង្រៀន​ប្រកបដោយ​ប្រសិទ្ធភាព​ខ្ពស់​តាម​ការ​រំពឹង​ទុក​។ កាន់តែ​ពិសេស គឺ​ការ​កសាងខ្លួន​ ក៏ដូចជា​ក្មេង​ៗជំនាន់​ក្រោយ​ឱ្យ​ក្លាយជា​សសរ​ដ៏​រឹងមាំ​ក្នុង​កិច្ច​រួមចំណែក​ទ្រទ្រង់​ ក៏ដូចជា​អភិវឌ្ឍ​ជាតិ​យើង​ឱ្យ​កាន់តែ​លូតលាស់​ទៅមុខ​ប្រកបដោយ​​វឌ្ឍន​ភាព​ថ្មី​ៗឡើង​ថែមទៀត​ផង​ដែរ​។

ធ្វើឱ្យជិវិតកូនលោកអ្នកកាន់តែប្រសើរ