ទំព័រដើម / លោកគ្រូ សំ វិចិត្រ
គ្រូបង្រៀនគណិតវិទ្យា
ខ្ញុំជាគ្រូបង្រៀនគណិតវិទ្យាម្នាក់ដែលជាអ្នកផ្តល់ចំណេះដឹងដល់សិស្ស។ ខ្ញុំបាទតែងតែប្រឹងប្រែងអស់ពីកម្លាំងចិត្ត និងកម្លាំងកាយ ដើម្បីឱ្យសិស្សទទួលបានជោគជ័យក្នុងការសិក្សា។ ការណ៍នេះ ក៏ដោយសារតែវាជាឧបនិស្ស័យរបស់ខ្ញុំ ដែលតែងតែស្រឡាញ់ការអប់រំតាំងតែពីតូចមក និងតែងតែស្រមៃថានឹងក្លាយជាគ្រូបង្រៀនម្នាក់ទៅថ្ងៃអនាគតនោះឯង។
កាលពីឆ្នាំ២០១៥ ក្រោយពីបានប្រឡងបញ្ចប់ គរុកោសល្យភូមិភាគរាជធានីភ្នំពេញ ខ្ញុំបានប្រឡូកចូលបម្រើការងារជាមន្ត្រីរាជការស៊ីវិលក្របខណ្ឌផ្នែកអប់រំរបស់ក្រសួងអប់រំយុវជន និងកីឡា ដោយចាប់ផ្តើមការងារនៅវិទ្យាល័យហ៊ុន សែនពញាពន់ បន្ទាប់មកនៅឆ្នាំ២០១៩ បានប្តូរទីកន្លែងបម្រើការងារមកអនុវិទ្យាល័យព្រែកព្នៅ រហូតមកដល់សព្វថ្ងៃនេះ។ ការអភិវឌ្ឍ និងមានមហិច្ឆតារបស់ខ្លួនមិនបានបញ្ចប់ត្រឹមនេះទេ។ ខ្ញុំនៅតែបន្តក្នុងការសិក្សារបស់ខ្លួនទៀត រហូតបានបញ្ចប់ បរិញ្ញាបត្រគណិតវិទ្យានៅសកលវិទ្យាល័យខេមរៈ នៅឆ្នាំ២០១៨។ ទន្ទឹមនឹងនេះ នៅឆ្នាំ២០១៩ ខ្ញុំពិតជាមានកិត្តិយសជាអតិរមាដែលបានចូលបម្រើការងារនៅសាលាអន្តរទ្វីប អាមេរិកាំង សាខាចោមចៅ ដែលជាគ្រឹះស្ថានអប់រំដ៏ល្បីល្បាញ និងមានកេរ្តិ៍ឈ្មោះល្បីសុះសាយពេញទូទាំងប្រទេសកម្ពុជា ខាងផ្នែក វិន័យគុណភាពនិងសេវាកម្ម។ នេះវាបានក្លាយជាទីតាំងការងារទីពីរដ៏កក់ក្តៅរបស់ខ្ញុំបាទ រហូតមកដល់បច្ចុប្បន្ននេះ ។ ដោយមូលហេតុថា ប្រទេសជាតិមួយរីកចម្រើន គឺដោយសារសង្គមនោះពោរពេញទៅដោយធនធានមនុស្សប្រកបទៅដោយសក្តានុពល ដូចនេះការរួមចំណែករបស់ខ្ញុំបាទ ពិតជាមានមោទកភាពខ្លាំងណាស់។
ការប្រឡូកក្នុងការងារទាំងអស់ នេះបានធ្វើឱ្យខ្ញុំបាទបានសិក្សា និងដកយកបទពិសោធថ្មីៗជាច្រើនរាប់មិនអស់ពីគ្នាទៅវិញទៅមករវាងបុគ្គលិក និងបុគ្គលិក បុគ្គលិក និងថ្នាក់ដឹកនាំ សម្រាប់យកទៅអនុវត្តក្នុងការបង្រៀនដល់សិស្ស ព្រោះការបង្រៀនមិនមែនបង្រៀនតែចំណេះដឹងទូទៅប៉ុណ្ណោះទេថែមទាំងបង្កើតកម្មវិធីផ្សេងៗជាច្រើនទៀតដូចជា កម្មវិធីចុះជួយសង្គម (លាបថ្នាំ ដាំផ្កា) ដំណើរទស្សនកិច្ចសិក្សារបស់សិស្សនៅខេត្តនាៗ ដើម្បីឱ្យសិស្សមានឱកាសស្វែងយល់ពីសង្គមខាងក្រៅ និងសិក្ខាសាលាជាដើម ជាពិសេសកម្មវិធីបរិស្ថាន សាលាតែងតែដឹកនាំ សិស្សានុសិស្សទាំងអស់ រួមទាំងបុគ្គលិក សម្អាតបរិស្ថាននៅក្នុងសាលា និងទីតាំងផ្សេងៗ។ ទោះបីទំហំការងារកាន់តែរីកធំ តែខ្លួនខ្ញុំពេញចិត្តនឹងទទួលពីអ្វីដែលថ្មីៗពីការងារទាំងនោះ ព្រោះការងារទាំងអស់នេះហើយដែលបានជំរុញចិត្តរបស់ខ្ញុំឱ្យខិតខំប្រឹងប្រែង និងមានទំនួលខុសត្រូវខ្ពស់លើមនសិការវិជ្ជាជីវៈរបស់ខ្លួនថែមទៀត។
ខ្ញុំប្តេជ្ញាថានឹងខិតខំបំពេញតាមតួនាទីរបស់ខ្លួនឱ្យរឹតតែល្អតទៅទៀត ពិសេសលើការសិក្សាស្រាវជ្រាវនូវអ្វីៗដែលថ្មីៗដើម្បីយកមកបង្ហាត់បង្ហាញសិស្សឱ្យសិស្សមានសកម្មភាពរស់រវើកក្នុងការរៀន ហើយធានាឱ្យបាននូវដំណើរការរៀននិងបង្រៀនប្រកបដោយប្រសិទ្ធភាពខ្ពស់តាមការរំពឹងទុក។ លើសពីនេះទៅទៀត វាជាការអភិវឌ្ឍន៍ខ្លួន និងផ្តល់ឱ្យក្មេងៗជំនាន់ក្រោយ ឱ្យក្លាយជាសសរទ្រូងដ៏រឹងមាំក្នុងកិច្ចរួមចំណែកទ្រទ្រង់ ក៏ដូចជាការអភិវឌ្ឍជាតិបស់យើងឱ្យកាន់តែលូតលាស់ទៅមុខប្រកបដោយភាពរីកចម្រើននៃសម័យកាលក្នុងសង្គមបច្ចុប្បន្នថ្មីៗយើងថែមទៀត។
សូមអរគុណ!
ខ្មែរ
អង់គ្លេស