សិក្ខាសាលាស្ដីពីជំងឺក្រពះនិងបំពង់ក

ដោយ​មើល​ឃើញ​ពី​កំណើន​នៃ​ផល​ប៉ះពាល់​ដែល​បណ្ដាល​មក​ពី​ជំងឺ​ផ្សេងៗ​ ​និង​ព្រួយ​បារម្ភ​ពី​ទុក្ខ​ធុរៈ​សុខុមាលភាព​លោកគ្រូ​ អ្នកគ្រូ​ និង​បុគ្គលិក​ទូទៅ​ផង​ ​នៅ​រសៀល​ថ្ងៃ​ទី​៦​តុលា កន្លងមកថ្មីៗ​នេះ​ ​គណៈកម្មការ​សាលារៀន​ ​អន្តរទ្វីប​ ​អាមេរិកាំង​ ​បាន​សហការគ្នា​ជាមួយនឹង​មន្ទីរ​ពេទ្យ​ ​បារាំង​-​វៀតណាម​ (FV)​ ​បើកជា សិក្ខា​សាលាមួយ​ស្ដីពី​ជំងឺ​ក្រពះ​និង​បំពង់ក​​​ ដើម្បី​បញ្ជ្រាប​ចំណេះដឹង​ទាក់ទងនឹង​ប្រភេទ​ជំងឺ​ទាំង​នេះ​ ជូន​ដល់​បុគ្គលិក​សិក្សា​ទូទៅ​ប្រមាណ​ជិត​៣​00នាក់​ ​នៅ​សាលារៀន​ ​អន្តរទ្វីប​ ​អាមេរិកាំង ទាំងបីសាខា។ថ្លែង​​នា​ឱកាសបើក​សិក្ខា​សាលា​នោះ​ ​លោក​ ​រឿង​ ​សុភាព​ ​ចាងហ្វាង​មធ្យម​សិក្សា​បឋមភូមិ​ ​នៃ​សាលារៀន​ ​អន្តរទ្វីប​ ​អាមេរិកាំង​ បាន​លើក​ឡើង​ថា​ ​គណៈគ្រប់គ្រង​សាលា​ឯកជន​កូនកាត់​មួយ​នេះ​ ​តែង​ព្រួយ​បារម្ភ​ និងយក​ចិត្ត​ទុកដាក់ពី​ទុក្ខធុរៈ​សុខុមាលភាព​បុគ្គលិក​សិក្សា​ ទើបបាន​បង្កើត​ឱ្យ​មាន​សិក្ខាសាលា​នេះ​ឡើង​ជា​រឿយៗ​ ដើម្បី​លើក​កម្ពស់​សុខុមាលភាព​បុគ្គលិក​សិក្សា​ផង​ ​និង​ដើម្បី​បញ្ជ្រាប​ចំណេះដឹង​ទូទៅ​ដល់​បុគ្គលិក​ក្នុង​ស្ថាប័ន​អប់រំមួយ​នេះ​ ​ឱ្យ​ឈ្វេងយល់​បាន​ច្បាស់​អំពី​រោគ​សញ្ញា​ ​វិធី​បង្ការ​​​ ​ការ​ថែ​ទាំង​សុខភាព​ជាដើម​ ​ព្រោះ​សុខភាព​ ជា​បញ្ហា​ចម្បង​របស់​មនុស្ស​គ្រប់​រូប​ដែល​យើង​មិន​គួរ​មើល​រំលង។ផ្តើម​ចេញ​ពី​អង្គ​សិក្ខា​សាលា​​​រយៈពេលជាង​២​ម៉ោង​ ​លោក​វេជ្ជបណ្ឌិត​ ​វើក​ ​រ៉ាស៊ីម​ ​ជំនាញ​វេជ្ជសាស្រ្ត​ទូទៅ​ប្រចាំ​មន្ទីរទេព្យ​ ​បារាំង​-​វៀតណាម​ បាន​ថ្លែង​ថា​ ​ក្នុង​រយៈពេល​ប៉ុន្មាន​ឆ្នាំ​ចុង​ក្រោយ​នេះ​ ​ជំងឺ​ក្រពះ​និង​បំពង់​​កហាក់​​ដូចជា​កើត​ច្រើន​ចំពោះ​ប្រជាជន​ខ្មែរ​ ដោយ​មួយ​ផ្នែក​នៃ​ជំងឺ​ទាំង​នេះ​ ​គឺ​បណ្ដាល​មក​ពី​ការ​ទទួល​ទាន​ចំណី​អាហារដែលមានរសជាតិ​មុតៗ​ ​គ្មាន​អនាម័យ​ ​និង​មាន​សារជាតិ​គីមី​ច្រើន​លើស​លុប។ ក្នុង​នោះ   ភេសជ្ជៈ​ ​សុរា​ និង​ស្រា​បៀរ​ ​ដែល​ជា​គ្រឿង​ស្រវឹង​ដ៏​ពេញ​និយម​នៅ​កម្ពុជា​ ​រួម​ទាំង​ការ​ពិសា​ម្លូស្លា​ផង​នោះ​ ​បាន​ជាប់​ចោទ​ជា​ភ្នាក់​ងារ​ចម្លង​ និង​បង្ក​ជំងឺ​ទាំង​នោះ​ផង​ដែរ។ ​នៅ​ចុងសិក្ខាសាលានោះ​ ​វាគ្មិន​ជំនាញ​វេជ្ជសាស្រ្ត​ទូទៅ​រូប​នេះ​ ​ក៏​បាន​ឆ្លៀត​លើក​សរសើរ​ចំពោះ​ម្ចាស់​ស្ថាប័ន​អប់រំ​មួយ​នេះ​ផង​ដែរ​ ដែល​មាន​គំនិត​ចេះ​រិះ​រក​មធ្យោបាយ​ទំនាក់ទំនង​ ​ឬស​ហការ​ជាមួយ​នឹងអង្គការ​ ស្ថាប័ន​នានា​ ​ដើម្បី​បើក​សិក្ខា​សាលា​ ​វគ្គ​តម្រង់​ទិស​ ឬ​វគ្គ​បណ្ដុះបណ្ដាល​យ៉ាង​សន្ធឹក​សន្ធាប់​ក្នុង​ការ​ពង្រឹង​ចំណេះដឹង​ទាក់ទង​ទៅ​នឹង​វេជ្ជសាស្រ្ត​ទូទៅ​ ​ក៏​ដូច​ចំណេះដឹង​ផ្សេងៗ​ដល់​បុគ្គលិក​សិក្សា​របស់​ខ្លួន។គួរ​ជម្រាប​ជូន​ថា​ ​គណៈគ្រប់គ្រង​សាលារៀន​ ​អន្តរទ្វីប​ ​អាមេរិកាំង​ ​រមែង​តែង​តែ​រៀប​ចំ​សិក្ខា​សាលា​ទាក់ទង​នឹង​សុខភាព​ផ្លូវ​ចិត្ត​ ផ្លូវ​កាយ​ជា​រៀង​រាល់​ឆ្នាំ​ ​ដើម្បី​ផ្តល់​ឱកាស​ឱ្យ​លោកគ្រូ​ ​អ្នកគ្រូ​ និង​បុគ្គលិក​ទូទៅ​បាន​ពិគ្រោះ​យោបល់​លម្អិត​ទាក់ទង​នឹង​សុខភាព​ជាមួយនឹង​វេជ្ជបណ្ឌិត​ជំនាញ​ៗ ហើយ​គ្រាន់​តែ​ក្នុង​កំលុង​រយៈពេល​ពីរ​ខែ​នេះ​ ​សាលារៀន​ ​អន្តរទ្វីប​ ​អាមេរិកាំង​ ​សាខាម៉ៅ​សេងទុង​ បាន​រៀប​ចំ​​សិក្ខា​សាលា​ស្ដីពី​សុខភាព​ទូទៅ​នេះ​ជូន​បុគ្គលិកសិក្សា​​បាន​៣ដងរួម​មក​ហើយ ដែលក្នុងនោះមានបុគ្គលិកជាង៧០០បានចូលរួម ក្រោម​ការ​សហការ​ជាមួយ​មន្ទីរ​ពេទ្យ​បារាំង​-​វៀតណាម​ (FV)។ នេះ​ជា​ការ​បញ្ជាក់​បន្ថែម​របស់​លោក​ ​រឿង​ សុភាព  ​ចាងហ្វាង​មធ្យម​សិក្សា​បឋមភូមិ​ ​នៃ​សាលារៀន​ ​អន្តរទ្វីប​ ​អាមេរិកាំង៕